UArchbishop Tutu ubhubhe namuhla ekuseni emzini wakhe eCapetown eseleminyaka yokuzalwa engamatshumi ayisitshiyagalolunye - 90.
Inengi kwele South Africa selichaze umuyi, obengumfundisi ebandleni leAnglican Church, njengeqhawe. Ngesikhathi sempi yoncindezelo kwele South Africa, umuyi wayekhuza kakhulu uhulumende wamamhlophe ngokuncindezela abensundu. Wabayingxenye yemikhankaso eminengi eyacina ngokuphela kombuso woncindezelo ngo1994.
Ukulwisana kwakhe lombuso woncindezelo engasebenzisi udlakela kwamenza waze waphiwa isicoco seNobel Peace Prize ngo1984.
Emazwini awethule ngemfa kaArchbishop Tutu, uMongameli Cyril Ramaphosa umchaze njengomuntu obengathikazi njalo engesabi nxa sekufanele alwele amalungelo oluntu.
Umfundisi webandla leAnglican eJohannesburg, uStephen Moreo, utshele iStudio 7 emzini kaTutu omdala oseSoweto ukuthi uzahlala ekhunjulwa ngothando abelalo eluntwini jikelele.
“Uye wathi kumbuso we-apartheid yekani ukwenza lento ngoba wonke umuntu udalwe ngomfanekiso kaThixo. Okwesibili ubengumuntu womthandazo. Okwesithathu ubethanda wonke umuntu it did not matter ukuthi uyiphi inationality, your sex, whatsoever.”
UNkosazana Amkele Chakela, obengumakhelwana kaTutu ngesikhathi esahlala eSoweto, uthi umuyi lomkahle uLeah bazahlala bekhunjulwa ngokuzehlisa lokuphilela ukusiza abahluphekayo.
“Mina ubaba uTutu ngimchaza njengomuntu olungileyo. Ubengena ekhaya lakithi lapho okuhlutshekwe khona. Wayengathi kuhlutshekiwe la ngeke ngingene. Nxa kuyiDecember time wayazi ukuthi alethe igrocery la ekhaya. The whole box and igrocery ebonakalayo.”
Your browser doesn’t support HTML5
UDesmond Tutu Kasekho
Esinye isizalwane sakwele South Africa, uMathamsanqa Faleni, uthi babonga uTutu labanye bakhe ngokubalethela inkululeko.
“Abantu abafana lotata uTutu basifundise ukuthi yintoni lento okuthiwa uxolo. Awuxoleli ukuba umuntu umthanda uyakwazi ukuxolela umuntu okuzwisa into ezibuhlungu. Nguye owasifundisa kuTruth Commission ukuthi yintoni okuthiwa luxolo. Lapha eVilakazi ngiyakwazi ukuhlala ngokukhululeka ngenxa yabo.
AbeZimbabwe labo bancoma uTutu njengomlweli wenkululeko owazinikelayo engafuni lutho ngaphandle kwenkululeko yabantu bonke.
UArchbishop Tutu utshiye umkakhe, uNkosikazi Leah Tutu, abantwana abane labazukulu abayisikhombisa. Abantu babuthene emzini wakhe eCapetown kodwa kukhangelelwe ukuthi kuqhutshwe inkonzo zenduduzo endaweni ezitshiyeneyo zelizwe. Amalungiselelo omngcwabo abengakaziswa.