Ingcwethi kwezempilakahle ithi kumele abesifazane abangena esikhathini okwesikhathi eside bedinge uncedo masinyane ngoba lokhu kulakho ukuba yisibonelo semikhuhlane etshiyeneyo.
USikhwicamfundo Solwayo Ngwenya osebenza eMpilo Hospital koBulawayo uthi ukopha kwabesifazane okwesikhathi eside kungabe kuveza imikhuhlane enjenge mvukuzane leminye ehlasela isibeletho. UNgwenya okhulume leStudio 7 ezimele, uthi kuqakathekile ukuba abesifazane ababhekane lesimo lesi bedinge uncedo kubodokotela.
"Umuntu wesifazane wadalwa ukuba uya esikhathini okwensuku eziyisikhombisa ungabona sekusedlula lapho kukhona okuyabe kungasahambi kahle umuntu uyamele ayedinga usizo ekilinika kumbe esibhedlela kusasemasinya."
UNgwenya uthi minengi imikhuhlane ehambelana lesimo lesi.
“Owesifazana engopha okungelamkhawulo uyabe eselenyama ezikhulayo ngaphakathi kwakhe, kumbe uma elemvukuzane yomlomo wesibeletho, imvukuzane yamaqanda kuthi omama asebekhulile asebeke bama ukuya esikhathini aphinde aqale futhi engabe elemvukuzane ngakho kuqakathekile ukuyahlolwa."
Uthi kulemizamo engenziwa ngodokotela ukuze kwelatshwe okunye okudala ukopha okuthatha isikhathi eside kwabesifazana.
"Owesifazana osewophe kwedlulisa amalawulo kumele ayehlolwa esibhedlela kulendlela ezehlukeneyo ezilandelwayo lapho kudingisiswa ukuthi imbangela yokopha ingabe isisusa singaphi. Umama uyahlolwa isibeletho lengaphakathi yakhe kusetshenziswa imitshina yakulezi insuku ezatsho ukuthi ayehlinzwa kumbe elatshwe kanjani."
UNkosazana Nompilo Nyoni ohlala koBulawayo uthi ulesimo lesi.
"Ngilakho ukopha okwesikhathi njalo sengakengahlolwa kwathiwa ngilama fabroids. Ngilinde ukuyahlinzwa."
UNkosikazi Beauty Nkiwane oleminyaka yokuzalwa engamatshumi ayisithupha laye uthi kuyamkhathaza lokhu.
"Kulento engihluphayo ungibona ngisiya ekilinika, ngasengimile ukuya esikhathini kodwa kuyaqala njalo futhi kuhlukene lakudala ngopha igazi elinukayo ngesinye isikhathi kubalobomvu."
Akwaziwa ukuba kulabesifazane abanengi kanganani eZimbabwe ababhekane lokopha okuthatha isikhathi eside.
SEE ALSO:
Udaba Esilwethulelwe NguAnnastacia Ndlovu