Uhulumende uthi uhlelo lwakhe lokulolonga abasakhulayo abaziwa kakhulu ngodlakela, olweNational Youth Service, luzaqala njalo ngoNhlangula lonyaka ngemva kokuvalwa okweminyaka embalwa edluleyo.
Umphathintambo obona ngezabatsha uMnu Tino Machakaire utshele intathelizindaba ngemva komhlangano weCabinet ngoLwesibili ukuthi bakhangelele ukulolonga abasakhulayo abazinkulungwane ezilitshumi, 10,000, phansi kwaloluhlelo lonyaka.
Uthe abazangena kulo ngabasakhulayo abaleminyaka esuka kwelitshumi lasitshiyangalombili, 18 kusiya kwengamatshumi amathathu lanhlanu, 35.
Wengeze wathi bazafundiswa ngemisebenzi yezandla kanye lokuthanda ilizwe labo.
Abasakhulayo abaphatheke kuloluhlelo eminyakeni edluleyo abaziwa ngokuthi ngamaGreen Bomber bebesetshenziswa libandla leZanu PF ukutshaya loluhlukuluza abamabandla aphikisayo ngesikhathi sokhetho.
Lanxa uhulumende esithi uhlelo olutsha lolu osoluzabizwa ngokuthi Youth Service in Zimbabwe ngolwabasakhulayo bonke kungakhathalekile ukuthi ngabaliphi ibandla, abanye bathi abakukholwa lokhu.
Ocubungula ezombusazwe uDr Mthulisi Mathuthu utshele iStudio 7 ukuthi ubona uhlelo lolu lusetshenziswa ukulolonga izidlova ezizathwalisa abantu beZimbabwe nzima zihlukuluza labo abangavumelani lombuso weZanu PF.
Your browser doesn’t support HTML5
Ingxoxo loDr Mthulisi Mathuthu