Ngemva kweminyaka emine kwenziwa ukhetho kwele Melika lokudinga umongameli. Onqobayo kukhetho lolo ugcotshwa afungiswe ukuba athathe isikhundla sokukhokhela ilizwe emkhosini abawubiza ngokuthi yiPresidential Inauguration.
Umkhuba wokwenza lumkhosi waqalisa ngomnyaka ka1789 njalo lokhe uqhubekela phambili kulez’insuku.
Sesifikile isikhathi sokuthi kugcotshwe njalo kufungiswe umongameli omutsha weMelika ngemva kokhetho olwenziwe nyakenye ngoLwezi lapho okunqobe khona uMnu. Donald Trump.
Njengenhlalayenza lokhu kuzakwenzelwa edale lephalamende eleCapitol Hill elamalunga aweCongress leSenate eWashington DC.
Amalungiselelo okugcotshwa kukamongameli omutsha weMelika asekuzinga eliphezulu.
Ukuqhubelana intambo zombuso kungela dlame yikho okuyinsika yombuso okhululekileyo kwele beMelika.
Lokhu kwasungulwa ngomnyaka ka1789 kugcotshwa umkhokheli wokuqala weMelika, uMongameli George Washington.
Umongameli omutsha ugcotshwa ngokufunga ukuthi uzasebenzela abantu beMelika sonke isikhathi njalo alandele isisekelo sombuso welizwe.
Ukufungiswa lokhu kwenziwa ongena esikhundleni lesi ephakamise isandla kuthi esinye sibambe iBhayibhili.
UMnu. Trump webandla lamaRepublicans, onqobe uNkosikazi Hillary Clinton webandla lama Democrats kukhetho olwenziwe nyakenye, ukhangelelwe ukufungiswa ngoLwesihlanu abesethatha intambo zombuso eziphethwe okwamanje nguMongameli Barack Obama.
UMnu. Phithizela Ngcobo, isizalwane seZimbabwe esihlala eMelika, uthi umkhuba lo uveza umbuso okhululekileyo kweleMelika.
“Lokhu ngikubona kuyinto eqakathekileyo njalo kuyinto enhle. Yinto okumele ikhuthazwe ngoba sibona ubukhosi busuka ezandleni zomunye busiya komunye umongameli.”
Banengi abantu abakhangelelwe ukuthi bazahamba kumkhosi wokugcoba umongameli omutsha weMelika ngoLwesihlanu.
Uthi kuqakathekile ukuthi kungene omunye umongameli kungedlula iminyaka emine.
Umongameli omutsha sonke isikhathi ukhangelelwe ukuletha imbono ebalulekileyo yokuthuthukisa inhlalakahle kazulu lokudlelana kuhle lamanye amazwe womhlaba.
UNgcobo uthi lokhu akuvamanga ukwenzakala emazweni awezwekazi leAfrica ngenxa yobuhwaba.
“Okunengi yikuthi inkokheli zethu zeAfrica zilobuhwaba. Zifuna ukuthi zidle zodwa uzulu ehlupheka. Yikho okwenza ukuthi zingaphumi embusweni.”
Kambe kubuhlungu na ukuthi umongameli atshiyele omunye umbuso? UNgcobo uthi hatshi njengoba besazi ukuthi kumele batshiye umsebenzi kungedlula iminyaka emine.
Okwamanje kuyisiphithiphithi eCapitol Hill kulungiselelwa umkhosi wokufungiswa kukaTrump ngoLwesihlanu.
Abalandeli bakaTrump bakhengelelwe ukuza ngobunengi emkhosini lo.
Amalunga amadale eSenate leCongress awebandla lama Democrats afika amatshumi amane lambili athi kawasoze abekhona kulumkhosi njengoba uTrump ethethise omunye wabo uMnu. John Lewis, owasebenza kabanzi lowayelwela amalungelo abensundu beseseyizigqili umuyi uDr. Martin Luther King.
Your browser doesn’t support HTML5
Udaba Esilethulelwe NguGibbs Dube