Uhlangothi olubona ngokubuthaniswa kwemali kahulumende eyemithelo, iZimbabwe Revenue Authority (ZIMRA) ithi bonke abantu abangena kwele Zimbabwe sokumele balunikeze, inani kanye lohlonzi lwempahla abalayo njalo lokuthi bangobani kusasele amahola amathathu bengakafiki elizweni leli.
Uhlangothi lwe ZIMRA luthi abanikazi bamabhasi, abamakhombi labe ndizamtshina kumele bathumele konke okufunakalayo ngobulembu be Internet ukwenzela ukuthi iphangise ukuhlolisisa impahla lozulu.
Ithi amankampani alayitsha impahla ezinengi sokumele asebenzise uhlelo lwe Automated System for Customs Data olusanda kusungulwa eZimbabwe.
Uhlelo lolu oluphawulwe yi United Nations Conference on Trade and Development lusebenzisa i-internet ngendlela eyenza ukuthi impahla ihlolisiswe yilabo abayithwalayo bengakafiki lapho abaya khona.
Iziqondiso lezi zethulwe yi ZIMRA kulandela ukuguqulwa komthetho we Customs and Excise Act njengalokho okufunwa ngumphathintambo wezemali uMnu. Tendai Biti lapho esethula ibudget yalonyaka edale lephalamende ekupheleni komnyaka odluleyo.
Umnu. Rejoice Ngwenya oyingcwethi kwezenotho uthi okwenziwa yi ZIMRA akusoze kulethe umahluko ebantwini abangenga elizweni ngenxa yokuhlupha kwe internet.
