Igciwane leCOVID-19 selitshiye abantu emhlabeni wonke jikelele bethithibele ngesikhathi sokufika umnyaka inhlanganiso yeWorld Health Organization yathi umkhuhlane weCoronavirus kumele uphathwe njengalowu obulala abantu abanengi kumbe iglobal pandemic ngeSilungu. NgoLwesine kuzabe sokungumnyaka ogcweleyo selokhu kwaqhamuka umkhuhlane lo edolobheni leWuhan kwele China.
Kusukela nyakenye, isibhedlela seJohns Hopkins University sithi sokulabantu abedlula izigidi ezilikhulu – 117 million asebetholakale bele COVID-19 kwathi abedlula izigidi ezimbili lengxenye – 2,5 million babulawa yiCoronavirus.
Inhlanganiso yeAfrica Centers for Disease Control ithi abantu abafika phose izigidi ezine – 3,9 million sebehlolwe batholakala bele COVID-19 kuzwekazi leAfrica kwabhuba abedlula kancane inkulungwane ezilikhulu – 105,000.
Abayizigidi ezintathu lengxenye – 3,5 million sebaphepha kumkhuhlane weCOVID-19 kuzwekazi leAfrica.
EZimbabwe uhlangothi lwezempilakahle lubika ukuba sokulabantu abafika phose inkulungwane ezingamatshumi amane – 36,260 asebehlolwe batholakala bele COVID-19 kwathi abazinkulungwane ezedlula kancane amatshumi amathathu – 34,000 baphepha kumkhuhlane lo. Sekwabhubha abantu abazinkulungwane lengxenye – 1,485.
USikhwicamfundo Solwayo Ngwenya, osebenza eMpilo Hospital, uthi umkhuhlane lo usuhluphe abantu okumangalisayo.
UNgwenya uthi kumele abantu bazivikele kumkhuhlane lo sonke isikhathi ngoba ulakho ukumemetheka kakhulu.
Sokulamajekiseni ambalwa awokunqabela ukumemetheka kwegciwane leCOVID-19, agoqela eyePfizer, Mordena, Johnson and Johnson, Sinopharm, Sputnik leAstrazeneca. Amazwe kuzwekazi leAfrica akhala ngokuswela imali yokuthenga amajekiseni la.
EZimbabwe kusetshenziswa iSinopharm eyanikwa ilizwe leli ngele China. Kukhangelelwe ukuba kuzatholakala amanye njalo amajekiseni avela kulelilizwe kuthi njalo eleZimbabwe lizama ukuthola amajekiseni atshiyeneyo adingwa lizwekazi leAfrica.
Okwamanje kwele Zimbabwe kubikwa ukuba abanye abezempilakahle bayala ukuhlatshwa ijekiseni yeSinopharm besithi akwaziwa ukuba iyisimo bani. UMongameli Emmerson Mnangagwa usanda kutshela abantu ukuthi uzahlatshwa kuliviki.
Umfundisi Useni Sibanda, umqondisi wenhlanganiso yeZimbabwe Christian Alliance, uthi basanda kwenza ucwaningo oluveza ukuba balutshwana abantu abafisa ukuhlatshwa ijekiseni yeSinopharm. Uthi uhulumende kumele afundise abantu ngejekiseni le.
UNgwenya uthi abantu kumele bazimisele ukuhlatshwa amajekiseni ukwenzela ukunqabela ukumemetheka kwegciwane leCOVID-19.
Akwaziwa ukuba umkhuhlane weCOVID-19 uzaphela sokutheni njengoba abantu emhlabeni wonke jikelele bethithibele ngenxa yokufelwa yizihlobo labangane.
Your browser doesn’t support HTML5
ICOVID-19 Isitshiye Abantu Bethithibele Emhlabeni Wonke Jikelele