AbeUnited Nations bathi bazimisele ukuphathisa kumalungiselelo okhetho oluzayo alubana benxusiwe nguhulumende, kutsho ummeli walumanyano eZimbabwe uMnu Alain Noudehou.
Ekhuluma emkhosini wokunanza usuku olwasungulwa ngalo iUN ngoLwesithathu eHarare, uMnu Noudehou utshele intatheli ukuthi umanyano lo uzimisele njalo ukuzebona ngendlela ukhetho oluzayo oluzaqhutshwa ngayo.
Ngakwelinye icele, abasekeli beZanu PF baphazamise umhlangano obuqoqwe luhlangothi lwedale lephalamende oluboba ngezesisekelo sombuso obukuhlaziya ukuguqulwa komthetho wezokhetho eMasvingo ngoLwesithathu wahle wamiswa usanda kuqalisa.
Abasekeli beZanu PF laba benze okufanayo ngoMvulo eMarondera kanye leMutare ngoLwesibili.
EMasvingo babikwa bedle amalahle bathembisa lokutshaya amalunga ephalamende agoqela uMnu Innocent Gonese weMDC kaTsvangirai labeZanu PF ekade beqhuba lumhlangano.
Inguquko ekuElectoral Ammendment Bill ijonge ukuguqula umthetho wokuvota, okuyinto iZanu PF engayithakazeleliyo.
Isikhulumeli secele leMDC elikhokhelwa nguMnu Welshman Ncube, uMnu Nhlanhla Dube uthe bayakusola okwenziwa yiZanu PF.
Kunjalo nje, iZimbabwe Electoral Commission ithi sinikeze uhulumende isicelo semali engangezigidi ezedlula amakhulu amabili, $220 million ezasetshenziswa ekuqhubeni ukhetho kanye lereferendum yesisekelo sombuso esitsha.
I ZEC ithi njalo abalezihlobo zabo ezafayo kumele bayekhangela ehofisini kaRegistrar General ukuthi amabizo abafi kakho yini kuluhlu lwevoters roll, esithi nxa ekhona kuzamele bawacitshise.