UMongameli Emmerson Mnangagwa uthi uhulumende wakhe uzaqhubeka ngohlelo lokulungisisa udaba lombhuqazwe weGukurahundi ukwenzela ukuba amanyanise uzulu. Wethule amazwi la Ngolwesine, eHarare emathuneni amaqhawe aweNational Heroes Acre kungcwatshwa uRidzayi Mabuya owalwa impi yenkululeko ekuviyo leZANLA, elaliphansi kwebandla leZanu.
UMabuya udabuka esigabeni seInsiza eMatabeleland South.
UMnangagwa wethule amazwi la ngesikhathi uhulumende eseqale uhlelo lolu eMatabeleland oluphikiswa ngabantu abanengi abathi akumelanga angene kudaba lolu ngoba kuthiwa ngomunye wabaphatheka kumbhuqazwe weGukurahundi loba ekuphika lokhu.
Uhlelo lolu luqhutshwa zinduna njalo kuvalelwe phandle ababalekela umbhuqazwe lo abahlala emazweni atshiyeneyo.
UMnangagwa uthi lokho okwenzakala emuva akumelanga kuqhubeke kuphazamisa ilizwe esithi uhulumende wakhe ufuna ukubambanisa abantu bonke.
“Udaba lokubambana luqakathekile kakhulu. Yikho saba leUnity Accord ngo1987. Khathesi sizame ukwenza ukuba kube lokuthoba amanxeba sisebenza lenduna ukuze siqede udaba lweGukuruhundi."
UMnangagwa uthe umsebenzi ozakwenziwa zinduna emhlubulweni weMatabeleland lapho ezizabhodabhoda zikhuluma labantu abathinteka ngombhuqhazwe weGukuruhandi.
Kodwa ingcitshi kwezombusazwe lendaba zokukhumisana umlotha zithi uhlelo oluqalwe nguhulumende alusoze lwenelise ukupholisa amanxeba ngoba lutshiya phandle ezinye izigaba zelizwe labanye abantu, zikhuthaza ukuba ngabe luqhutshwa lasebulenjini beInternet.
Eyinye yalez’ingcitshi esebenza lenhlanganiso eyeHeal Zimbabwe uMnu. Reward Siziba uthi kumele bekumele uhlelo lolu luqhutshwe ngendlela eyamukelwa ngumuntu wonke.
"Nxa sikhuluma ngodaba lolua abantu babekhangele ukuba uMongameli Mnangagwa alungise udaba lolu. Okwakhathesi uhulumende uthi usebenza lezinduna kambe yizo zodwa na ezingalungisisa lokhu? Kumele uhlelo lolu lwamukeleke emuntwini wonke."
Lokhu kusekelwe nguMnu. Mnu Mbuso Fuzwayo okunhlanganiso yeIbhetshu Likazulu othi lobanje uhulumende enze kuhle ukusungula uhlelo lokukhulumisana lozulu ngombhuqazwe lo, bekumele engafaki imigoqo.
"Nxa befuna ukuba uhlelo lolu luphumelele kumele benze ukuba labo abaphazanyiswa yi Gukurahundi bazikhulumele hatshi ukuba kuyini okwenzakalayo kulokuthi basebenzise abantu abangelani lodubo lolu."
Ilunga leZANU PF uMnu Prince Ncube uthi okwenziwa nguMnangagwa kulungile ngoba kuyindlela ezakwenza ukuba ilizwe libe lentuthuko kungabi labanye abayabe belokhu bebhibhidla amanxeba aseleminyaka leminyaka.
"UMongameli Mnangagwa ubambanisa abantu be Zimbabwe. Siyathaba ngendlela enza ngayo, umsebenzi awenze lezinduna ngoba lokhu yikho okuzabambanisa abantu be Zimbabwe"
Kulabantu abafika inkulungwane ezingamatshumi amabili – 20,000 ababulawayo yiFifth Brigade kusukela ngomnyaka ka1982 kusiya ku1986 ibandla lePF Zapu elalikhokhelwa nguJoshua Mqabuko Nkomo lingakalobelani isivumelwano somanyano leleZanu PF ngomnyaka ka1987.
Owayengumkhokheli weliwe uRobert Mugabe wayala ukuxolisa esithi kwakuyikuphambana kancane okwenzakala ngaleso sikhathi. Wayakogoqwanyawo engaxolisanga.
Uhulumende wake wazama ukuhlolisisa udaba lolu esebenzisa iChihambakwe Commission of Inquiry eyeyikhokhelwa ligqwetha elikhulu uMnu. Simplicious Chihambakwe kodwa impumela yakhona yafihlwa.
Abanye babambe owangaphansi besithi pho lokhu okwenziwa zinduna ngokwani njengoba lakho kulakho ukuba kugcinwe emawofisini kahulumende kumbe kulahle nguMnangagwa.
Kulabanye njalo abathi uMnangagwa ulakho ukuphekapheka impumela yakhokhu okuqhutshwa okwamanje zinduna. Abadala bathi sizayicela isivuthiwe.
Kusenjalo, ucome njalo okwenziwa ngumabuya esithi walwa kakhulu ifuna ukuba eleZimbabwe libelozibuse.
UMabuya wathwetshulwa yingwe mhlaka 12 Zibandlela ngomnyaka ka1952 esigabeni seInsiza, eMatabeleland South. Ubhubhe ngeviki edluleyo ngemva kokugula okwesikhatshana.
Ngomnyaka ka1954 imuli yako Mabuya yathuthela kwele Zambia, kwathi ngo1969 uMabuya waphatheka kwezombusazwe ngokungena kwakhe kuviyo leZANLA.
Wasuka waya enkambeni ye Itumbi kwele Tanzania lapho aqeda izifundo zakhe zebutho.
Kusukela ngomnyaka ka1972 uMabuya walwa impi esendaweni yeMutoko, kwathi ilizwe selithole uzibuse wangena kubutho leZimbabwe National Army.
Utshiye unkosikazi, abantwana labazukulu abambalwa.