Ilizwe leZimbabwe likhangelelwe ukuthi lizakwethulelwa usuku lokuvota ekupheleni kwenyanga. Lokhu kwethulwe nguMongameli Emmerson Mnangagwa lamuhla eMutare emhlanganweni webandla leZanu PF wokukhankasela ukhetho.
Bekulabantu abanengi emhlanganweni webandla leZanu PF eMutare.
UMnangagwa utshele abantu abasemhlanganweni lo ukuthi selidumela emansumpeni ukuthi kwethulwe usuku lokhetho.
“Sizalethulela usuku lokhetho oluzayo ekupheleni kwenyanga yonale. Singakwenza lokhu sizaqalisa ukukhankasa okuzwayo. Sizabuya lapha njalo ukuthi sizekhuluma lani ukuthi lisivotele. Siyabonga kakhulu ukuthi lasisekela ngokuthula singena kuhulumende. Ngake ngeqa umgcele lapha ngisenzela ukuvikela impilo yami. Ngaba yi border jumper. Nxa ilanga lakho lingakafiki, liyabe lingakafiki. Babefuna ukungibulala kodwa okwalamuhla ngikuhulumende lapho esisebenza khona ndawonye.”
Uthi ilizwe leZimbabwe lidinga uncedo kwamanye amazwe lokuthuthukisa umnotho.
“Sifuna ukuthi abantu bakwamanye amazwe basebenze lathi ukwenzela ukuthi sithuthukise ilizwe leZimbabwe. Besekuleminyaka engamatshumi amabili singatholi uncedo kwamanye amazwe. Kodwa okwamanje sisebenza okumangalisayo ukuthi sithole uncedo oluvela kwamanye amazwe. Sizanda kulobelana izivumelwano lamanye amazwe ezifika izigidi ezingamatshumi amahlanu – 500 million dollars.
“Okunye njalo sokulemali efika izigidi engingamabhiliyoni alitshumi lanhlanu – $15 billion - elakho ukusetshenziswa kwele Zimbabwe. Ngaphandle kwalokho kulamankampani amanengi kakhulu anjenge General Electric yeMelika afuna ukusincedisa kwezomlilo kagetsi. Abanye ngabangane bethu abeChina esisanda kulobelana labo izivumelwano ezinengi.”
Abantu abahambe emhlanganweni webandla leZanu PF.
Uthi akumelanga uhulumende wakhe aqhube inhlelo ezikhahlameza uzulu.
“Singeke siqhubekele phambili sisenza okwakusenziwa kudala. Sokumele sifunde kulokho okuhle okwenzakalayo ukwenzela ukuthi sibelempilo engcono. Kumele singenzi okubi okwenzakala kudala. Akumelanga sikwenze loba kanjani.”
UMnangagwa uthi okwamanje uhulumende wakhe wenza okwehlukene lokwakusenziwa nguMnu. Robert Mugabe owasuswa esikhundleni nyakenye. Uthi kumele uhulumende alalele okufiswa nguzulu.
“Njengenkokheli senza okwehlukene lobekusenziwa ngabanye. Mina ngingumuntu olalelayo. Ngiyisithunywa senu. Bonke engisebenza labo kumele benze njalo. Kumele balalele abantu. Kumele basebenzele abantu. Konke esikwenzayo kumele sikwenzele abantu.”
Uthi kumele kwenziwe ukhetho olubalulekileyo. “Sifuna ukuthi ukhetho lwethu lube ngolukhululekileyo. Kasifuni ukulwisana labantu ngesikhathi sokhetho. Lokhu kutshengisa ukuthi ibandla leZanu PF ngelabantu abakhululekileyo. Akumelanga siphambaniswe ngabantu abancane abahamba ilizwe lonke bethethisa abanye. Asikwenzi lokhu thina.”
Uphinde wathi kusobala ukuthi uhulumende wakhe uzaguqula umnotho welizwe, ikakhulu nxa kungathuthukiswa ezokulima.
“Sahamba empini ukuthi sithole umhlabathi. Sesawuthola umhlabathi osokusele yikuthi sisebenze kakhulu ukwenzela ukuthi sakhe okugceleyo ilizwe lethu. Kancane kancane sizalakha ilizwe lethu.”
Bekulabantu abanengi emhlanganweni lo owezelwa eSakubva Stadium.
Your browser doesn’t support HTML5
Udaba Esilethulelwe nguGibbs Dube