Obona ngokwethulwa kwemibiko kuZanu PF, uMnu. Simon Khayo Moyo, useyethule umbiko elandula ubudlelwano phakathi kowaye ngumphathintambo wezemali uMnu. Ignatious Chombo, uKudzanayi Chipanga loInnocent Hamandishe abaphume emfanekisweni begqoke impahla zebandla leZANU-PF.
Abathathu laba bakhululwe ngeviki edluleyo ngemva kokuvalelwa ngoLwezi ngelanga ibutho lihluthuna umbuso kowayengumongameli Robert Mugabe njalo izolo kuphume umfanekiso wabo beqgoke impahla zeZANU PF.
Embikweni wakhe uMoyo uthe bobathathu sebaxotshwa kuZANU njalo abalalungelo lokumela ibandla kumbe uMongameli Emmerson Mnangagwa. Ubabize njengezephulamthetho ezifuna ukungcolisa ibizo leZANU PF kunye lelika Mnangagwa.
Ohlaziya ngezombusazwe umnumzana Bongani Nyathi uthi amazwi kaMoyo atshengisa ukungezwani lokungathembani okuphakathi kweZANU- PF okuqhubekela phambili. Wathi kuveza njalo ukuhlukunyezwa kwalabo abakade bekucele leG40 bephethwe njengezitha zelizwe.
UMnu. Iphithule Maphosa uthe ukubonakala kwabathathu laba beqgoke impahla yeZANU- PF kutsho ukuthi IZANU –PF yilo ikhaya abalaziyo njalo akutsho ukuthi umntwana engona ekhaya useguqula isibongo.
UChombo ephinde wabotshelwa elinye njalo icala ngoLwesithathu ngesikhathi esiyazibika emapholiseni njengalokhu okumele akwenze phansi kweziqondiso zokuhlawulela imali yesibambiso eye bail.
Ubesetheswa umlandu wokungaqhubi kuhle uhlelo lokwabela abantu indawo zokuhlala phansi kohlelo lweGarikai/Hlalani kuhle. Ulele esekhululiwe wafakwa ezandleni zeqgwetha lakhe umnumzana Lovemore Madhuku.
Umnumzana Maphosa uthi ukubotshwa kukaChombo akumangalisi kodwa bakhangelele ukuthi kubotshwe labanye ababentshontsha ngesikhathi bekuhulumende hatshi ukuthi ahlukunyezwe eyedwa.
UChombo, uChipanga kunye loHamandishe babengamalunga egxenye yeZANU PF eyaziwa ngokuthi yiG40 njalo baxabana kakhulu lengxenye yeLacoste kwaze kwaxotshwa uMnangagwa kubandla leZANU PF.
Your browser doesn’t support HTML5
UChombo Labanye Bakhe Kuthiwa Kabalabudlwelwano Lebandla leZanu PF