Abakhokheli bamabandla akuhulumende womanyano sebelaye abameli babo kunkulumo ukuthi bezame ukulungisisa konke okulokhu kuhlupha kuhulumende njalo bebaphe ugwalo olulezixwayiso ezipheleleyo kungakafiki uMvulo weviki ezayo.
UMongameli Robert Mugabe, uMnu Morgan Tsvangirai kanye loMnu Arthur Mutambara bahlangene ngoMvulo kuyonale iviki bakhulumisana phezu kogwalo lwezixwayiso abaziphiwe ngabamela amabandla abo kunkulumo, zona esezidonse okwesikhathi eside.
Iphephandaba leHerald lithi abathathu laba bavumelene phezu kwezixwayiso ezinengi ezenziwe ngabameli babo. Kodwa libika njalo ukuthi kukhona lapho abehluleke ukuvumelana khona.
Umphathintambo obona ngokwenzakala ewofisini kaMnu Tsvangirai, uMnu Gorden Moyo utshele uNtungamili Nkomo owe Studio7 ukuthi uMugabe, uTsvangirai kanye loMutambara bafuna konke okulokhu kuhlupha kuhulumende womanyano kulungisiswe kungakafiki ikhisimusi, esithi bafuna abameli babo babe sebeqede inkulumo lezi ngoMvulo.