Izakhamizi zeGwanda zithi ikhomishini ekhangelelwe ukubunjwa ezaphenya amacala okuhlukuluzwa kukazulu ngabezomvikela elizweni, kumele ibengezimeleyo hatshi ngebizo kuphela kodwa langezenzo.
Izakhamizi zeGwanda zithi lanxa zisamukela ukubunjwa kwalikomishini zesabela ukuthi kayisoze yaba ngezimeleyo ngeqiniso okungadala ukuthi ingasebenzi kuhle.
Izakhamizi zeGwanda zibuye ngobunengi ngoLwesibili ukuzohlangana lequla lekomidi yedale lephalamende ebona ngezomvikela lapho eziveze imbono etshiyeneyo.
UMnu. Jastone Mazhale olilunga leHeal Zimbabwe ugcizelele ukuthi likomishini le kumele izimele yodwa.
Amazwi la asekelwe nguMnu. Wellington Nare othi labo abazaqhatshwa kulikomishini kumele kube ngabantu abalesithunzi.
UMnu. Ndaniso Mpande uthi ufuna likomishini ihlolisise njalo amacala adalwa ngabezombusazwe hatshi abezomvikela kuphela.
UNkosazana Linda Mpofu esinye njalo isakhamuzi uthi yena ukhathazekile ngodaba lokuthi likomishini izacubungula amacala adalwe phakathi kweminyaka emithathu edluleyo kuphela.
Amazwi la asekelwe nguNkosikazi Sithabile Tshuma.
UNkosikazi Sibusisiwe Moyo uthi likomishini akumelanga iqhatshe amaxhegu.
“Kanti kungani kungabikhona abantu abatsha abadinga imsebenzi, bakhona abantwabethu abafundileyo abalamadegree abahlezi ezindlini abalamisebenzi kodwa oRetired lokhu bethatha imsebenzi yabantwana kugraduater abantwana abanengi emauniversity abangelamsebenzi kodwa kulabo Retired labobanibani abadala, hlalani phansi badala liyethela abantwana inganekwane,” kutsho uNkosikazi Moyo.
Umgcinisihlalo wekomidi yezomvikela uMnu. Levi Mayihlome uthe bazakwamukela limbono yezakhamizi zeGwanda njengoba injalo iyehlanganiswa lembono yabanye elizweni jikelele ngaphambilini kokuthi likomishini ibunjwe.
Your browser doesn’t support HTML5
UAlbert Ncube Uyalandisa