Ibandla leMovement for Democratic Change elikhokhelwa nguMorgan Tsvangirai selicele inhlanganiso ezigoqela eye Southern African Development Community, United Nations le Africa Union ukuthi zingenele eZimbabwe lapho uzulu otshengisela ezitaladini asethwaliswe khona nzima ngamapholisa lamalunga ebandla leZanu PF.
Lokhu kulandela ukubhaxabulwa kwamalunga amabandla angaphansi kwenhlanganiso yeNational Electoral Reform Agenda (NERA) akade etshengisela eHarare, Gweru, Kadoma, Chinhoyi, Gwanda, Mutare, Zvishavane lakwamanye amadolobho ekhonona ngendlela okuqhutsha ngayo ukhetho eZimbabwe.
IMDC-T yenze isicelo lesi kumbiko ewethule ngeSonto kulandela ukutshengisela kwamalunga amabandla atshiyeneyo ngoMgqibelo. Manengi amalunga amabandla atshiyeneyo aphikisa elibusayo iZanu PF atshaywe ngoMgqibelo ngamapholisa lalabo abacatshangelwa ukuthi ngabasekela ibandla likaMugabe.
Ibandla leMDC-T lithi ukulumende kaMongameli Robert Mugabe usefaka okufihlakeleyo imithetho yokuvimba ukutshengisela ezitaladini esebenzisa amapholisa labasakhulayo bebandla lakhe abake bacela ukuthi bafuna ukusebenza lamapholisa.
IMDC-T ithi isimo sezombusazwe sesisibi okokuthi sokusele kancane ukuthi kube lempi elizweni kumbe ukungezwani okuzabhidliza ilizwe.
Kasenelisanga ukukhuluma leziphathamandla zikahulumande njalo lamapholisa ngodaba lolu.