UNkosikazi Sheffra Dzamara umkakhe kaMnu Itai Dzamara, yena othunjwe ngabantu abanakanelwa ukuthi ngabacuphi beCIO eHarare secele abantu abathumbe umkakhe ukuthi bamphenduse ephila.
Ekhuluma leStudio 7 ngoLwesibili uNkosikazi Dzamara uthe uzwa ubuhlungu kakhulu ngokucatsha komkakhe.
Wengeze wathi kalakuthandabuza ukuthi uDzamara uthunjwe ngabacuphi phezu kohlelo lwakhe lokutshengisela eAfrica Unity Square eHarare, esithi uMongameli Mugabe sokumele asuke esikhundleni.
Manengi amalunga labasakhulayo beMDC abaseke bacatsha eminyakeni edluleyo abagoqela uTonderai Ndira, Tichaona Chiminya, Beta Chokurumana labanye abatholakala sebefile.
UNkosikazi Dzamara uthi uhambe emapholiseni wayamangala ukuthi kulamadoda amahlanu athumbe umkakhe eHarare izolo.
Ilunga lomkhankaso wokutshengisela okhokhelwa nguDzamara oweOccupy Africa Unity Square uMnu Charles Nyoni usole kakhulu isehlakalo lesi.
Kunjalo nje amagqwetha eZimbabwe Lawyers for Human Rights acele umthethwandaba ukuthi ulaye yiloba ngubani ongaba egcine uDzamara ukuthi amkhulule.
Siphinde saxhuma okhokhela ugatsha lwabasakhulayo kuMDC ekhokhelwa nguMnu Welshman Ncube uMnu Descent Bajila laye osole ukuthunjwa kukaDzamara.