Inkomo sezisifa kabuhlungu esabelweni seZansi yeMaNdebeleni lapho ezibanjelwa edakeni zidinga amanzi okunatha. Abogatsha lwezokulima esabelweni lesi bathi sezedlula inkulungwane ezine inkomo esezifile ngenxa yendlala lokusilela kwamanzi.Umsakazo weStudio 7 wethekelele kwelinye idamu eNtalale lapho inkomo esezifela khona.
UMnu Patson Sithole isakhamuzi sakoMene eNtalale uthi idamu labo selibalethela udubo ngoba inkomo sezibanjelwa njalo nje.
Ziyaphela inkomo eMatabeleland South
“Siledamu eselilethe udubo ngodaka, inkomo ziyatoto, sifisa ukuthi ngabe kweneliseka ukuthi lapho okuhwame khona kukhukhulu. eyinye inkinga yikuthi abantu sebelala bengena khona betshotsnha inhlanzi.”
Amazwi la asekelwe nguMnu. Utsibile Ndlovu othi sezinengi kakhulu izifuyo ezibanjelwa edamu leMene ngoba selisitsha.
“Inkomo ziyabanjelwa ,sithwele nzima, asila manzi , imbuzi, nkomo ,donki kuyafana.Nxa umgumlimu kumele uyehlola edamu kathathu ngelanga ubone ukuthi isifuyo sakho kasibanjelwanga edakeni.Silohlupho olukhulu kakhulu asazi singaluqeda ngani, mina esengazibonayo ziyafika 50 ngibala lamadonki.”
Imbongi, eyisakhamuzi seNtalale, uMnu. Nqindi Lerato Ndlovu, uthi isomiso esidalwe yisikhudumezi somkhathi ese-El Nino sesibangele ubunzima obukhuluesigabeni lesi.
Sezicake okumangalisayo inkomo eMatabeleland South
“Inkomo zibanjwa edamu ngoba kulendlala abantu abayilwisayo ngale kuyalinywa phansi ukuthi abantu badle kubesekusithi ngapha amanzi ayatshona ayaphala zona inkomo ziwafuna kungasintando yabo kodwa kungumkhathi ngenxa yeClimate Change akuselalutho olungani luqondile.”
Kusenjalo, uMnu. Justice Ndlovu umgcinisihlalo wekhomithi yeGaranyemba Ward Drought Mitigation Centre uthi kuyadingeka ukuthi uhulumende abaphathele isikuba senkomo ngentengo enganeno ukuze bahlenge izifuyo zabo.
“Isimo sendlala esikiso lapha sikhulu kakhulu ebantwini lakuzifuyo, ikakhulu kuzifuyo sezisifa ziyaphela okungangokuthi ngabe siyathola isikuba senkomo khonapha ngentengo ephansi enjengaleyo esike sathengiselwa ngayo ekuqaleni.”
UMnu. Elijah Magwaza Moyo ohlala eDzidzane eGaranyemba laye uthi bahlaselwe yindlala lezifuyo zabo.
Lobu butshani benkomo esezicuba eMatabeleland South
“Inkomo ziyafa, ziyalamba sibili zicakile, indlala yezifuyo leyabantu.Abantu silendlala sihlala sikhuluma, uhulumende uyasincedisa sibili kodwa uyaphuza.”
UNkosikazi Tina Khumalo unobhala weDrought Mitigation Centre yeGaranyemba uthi bahlaselwe yindlala embi kungakho belima imbhida ukuze baziphilise lezimuli zabo.
“Lapha emakahaya indlala inkulu kakhulu lanxa abantu besebenza khonapha basebenza bephakathi kwendlala , basebenzela ukuthi mhlawumbe into le ingabasiza ibathuthukise abantwana badle.”
Ingcwethi yezifuyo kugatsha lwezokulima olweAgritex uMnu Zondani Muchemwa uthi inkomo ezedlula inkulungwane ezine - 4,172 sezibulewe yindlala inengi lazo zisifa esiqintini seGwanda lapho osekufe ezedlula inkulungwane ezimbili – 2,071.
Ziyafa izifuyo ezinengi eMatabeleland South
“Isimo sibi kulesisabelo,izifuyo ziyafa ngenxa yokusilela kwamanzi kanye lokutshabalala kwamadlelo,amadamu sesitshile njalo sekugcwele udaka olubamba inkomo lapho zidinga amanzi.”
Uphinde wathi uhulumende uphakathi kokuphathisa abalima ngokudla kwenkomo kanye lokugebha izikotsho emaphandleni ukuze zingapheli zonke.
Uhulumende uthi kusiyaphela umnyaka kulakho ukufa inkomo ezedlula izigidi ezimbili - 2,3 million ngenxa yendlala.
SEE ALSO:
Udaba Esilwethulelwe NguAlbert Ncube