Inhlanganiso yamagqwetha eye Zimbabwe Lawyers for Human Rights ithi usekhululwe uMnu. Advance Musoki, obotshwe ethola isicoco sokuqeda imfundo ekolitshini leNational University of Science and Technology ngoLwesihlanu lapho atshele khona uMongameli Robert Mugabe ukuthi bafuna imisebenzi.
Inhlanganiso le ithi uMusoki umelwe ligqwetha le ZLHR uMnu. Mehluli Dube elibonise umthethwandaba ukuthi akade ekufuna yikutshela uMugabe ukuthi bayahlupheka abantu abaqeda izifundo emakolitshini ngenxa yokuswelakala kwemisebenzi.
UMusoki ubethoniswa kusetshenziswa iziqondisi zomthetho obizwa ngokuthi yiSection 46 of the Criminal Law (Codification and Reform) Act.
UMugabe umangaliswe ngujaha lo ongowesine ukwenza lokhu kulandela okufanayo okwenziwa ekolitshini le University of Zimbabwe nguTonderai Dombo, uThembinkosi Rushwaya loAlexander Mukamba ababotshwa bakhululwa sebebhadaliswe imali yokuthi benza ubutshapha emphakathini.
Izifundi ezinengi zikhala ngokungatholi imisebenzi eZimbabwe lapho umnotho welizwe osubhidlika.