Ijekiseni lomuthi wokuzivikela kuCoronavirus selifikile kweleSouth Africa. Leli lizwe yilo elihlaselwe kakubi ngumkhuhlane lo, ukwedlula wonke ezwekazi leAfrica osekwenze lamukelwe ngenjabulo ngabanengi lobanje bekhona abangalemukeliyo.
Ukufika kwejekiseni lomuthi wokuzivikela kuCoronavirus, owevaccine eyeOxford-AstraZeneca elilungiswe yinkampani yeSerum Institute of India, kukhange iziphathamandla zikahulumende okugoqela lomongameli Cyril Ramaphosa ukuthi bayezibonela ngawabo amehlo lumuthi ufika silindweni sendizamtshina eseOR Tambo International Airport eGoli.
“Sithokoze kakhulu ngokufika kwalo umuthi.”
ISouth Africa esilabantu abedlula isigidi lezinkulungwane ezingamakhulu amane (over 1.4 million) ababanjwe yilo umkhuhlane labedlula izinkulungwane ezingamatshumi amane lantathu (over 43,000) asebefile, ngeyokuqala eAfrica jikelele ukutholalo umuthi.
Uhulumende uthi amajekiseni ayisigidi (1 million doses) awathole lamhlanje azabangawezisebenzi zempilakahle labanye abafakwe ngumsebenzi wabo engozini yokuthola icoronavirus. Phakathi kwayonale inyanga futhi kuzalandela ezinye injekiseni eziyingxenye yesigidi.
Umphathintambo wogatsha lwezempilakahle umnumnzana Zweli Mkhize uthi kuzathi kusiyaphela umnyaka abantu abayizigidi ezingamatshumi amane (40 million) sebewutholile lumuthi kweleSouth Africa.
“Sizasebenza kanzima ukuthola umuthi ozokwenela bonke abafanele bawuthole.”
Izizalwane zeZimbabwe ezihlala kweleSouth Africa sezemukele ngendlela etshiyeneyo ukufika kwalo umuthi.
Unkosazana Sheron Masuku uthi yena okwakhathesi akakazimiseli ukuthola lo umuthi.
“For mina Hayi I don’t think I will volunteer to be vaccinated ngoba ngisafuna ukuqala ngibone abanye bevaccineta. May be next month or March yes. Now hayi mabahambe abanye bakhululeke bayehlatshwa mina ngizabona bona nxa sebevela hlatshwa how do they react. I’m just afraid of side effects.”
Umnumnzana Ntuthuko Mpofu yena akalaqiniso ukuthi ma eliphiwe ithuba awemukele kumbe hatshi.
“Ma sikhuluma ngale ndaba yevaccine ngilenjabulo enkulu kakhulu lokukhathazeka. But engingakutsho yikuthi abazayithatha levaccine sibafisela inhlanhla ngoba kuzenza umahluko empilweni zabo lempilweni zethu.”
Kodwake umnumnzana Norman Dladla uthi uwulindele ngamehlo abomvu lumuthi.
“Mina angifeel bad because ngikhule ngayo lento just because why? ngesikhathi sisakhula thina bebesithumela esikolweni basitshele ukuthi izani lizojova basivalela isick le ezayo thina singayazi ukuthi izoza bona beyazi.”
Umphathintambo wogatsha lwezempilakahle umnumnzana Zweli Mkhize utshele abezindaba ukuthi akukaziwa ukuthi iziphathamandla zikahulumende zizangena yini kuqula lakuqala labazathola lumuthi kumbe hatshi. Uthi nxa bengena bazangena kuphela ukuthi bakhuthaze uzulu makhaza ukuthi awemukele lumuthi.
Kodwake umnumnzana Mkhize uthi kusazothatha phose amaviki amabili abantu bengakaqali ukuhlatshwa amajekiseni alo umuthi. Uthi lumuthi kuzafuze uhlolwe uhlonzi lwawo, bese ubalwa ukuthi wenele yini isigidi. Bafuna njalo ukufeza inhlelo zokuthwalwa kwawo ususiya lapho abantu abazahlatshelwa khona.
Uhulumende weZimbabwe laye usanda kumemezela ukuthi usefake eceleni izigidi ezilikhulu zamadola ($100million) eyimali elungele ukuthenga umuthi wokuvikela icoronavirus .