Selehlulekile ibandla le-African National Congress ukuthola amavoti angenza ukuba libumbe lilodwa uhulumende kwele South Africa.
Abezindaba abeAssociated Press labe Reuters babika ukuba asebaliwe phose wonke amavoti okhetho oluqhutshwe ngoLwesithathu. Kubikwa ukuba ibandla leANC lilamavoti edlula kancane okuyisilinganiso sokungamatshumi amane ekhulwini lilandelwa ngele Democratic Alliance elilamavoti angamatshumi amabili lanye ekhulwini – 21%.
Ibandla leUmkhonto Wesizwe elisanda kubunjwa ngowayengumongameli uMnu. Jacob Zuma lona lilamavoti ayisilinganiso sokulitshumi lane ekhulwini – 14%. EleEconomic Freedom Fighters elikhokhelwa nguMnu. Julius Malema lona lolamavoti afika phose isilinganiso sokulitshumi ekhulwini – 9%.
Kusobala ukuba eleANC kuzamele libambisane lamanye amabandla ukuze libumbe uhulumende. Akukaze kwenzakale lokhu selokhu lathola uzibuse ngomnyaka ka1994.
Ukuze sihlaziye udaba lolu, sixoxe loMnu. Fortune Mlalazi ungcwethi kwezombusazwe ezimeleyo othi ibandla elake lakhokhelwa ngumuyi uNelson Mandela liphakathi kwelitshe lembhokodo.