Sekuzinsuku ezingamatshumi ayisithupha lasitshiyagalolunye (69) lokhu abongi baqalayo ukukhalala umsebenzi. Lokhu sekubangele ukuba umumo ezibhedlela ube mubi ngamandla ngoba sebebalutshwane abongi abasezibhedlela.
Umnumzana Thamsanqa Donga oyisakhamuzi sakoBulawayo ukhuluma ngesiphatho ahlangane laso esibhedlela seMpilo.
“Lokhe sifikileyo lapho sibona ama nurse amabili ebhodabhoda lapha esibhedlela, manje kusuka kube nzima ngoba izigulane zinengi ezifuna ukukhangelwa. Sithe sikhangela lebhukwini likababa akubhalwanga lutho, i temperature labo BP akuthathwanga lokhu kusuka kube nzima ukuthi even lanxa udokotela engabuya. Ufuka akhangeleni ngoba information okumele ibesebhukwini ayikho. Kunzima kakhulu akula ma nurse njalo lawa akhona akhulelwa ngumsebenzi acine sesenza lokhu abakukwanisayo.”
Inhlanganiso yabongi eyeZimbabwe Nurses Association izolo yethule umbiko othi ngaphandle kokuba izikhalazo zabongi ezigoqela iholo lamadola eMelika kanye lempahla zokuzivikela kuCoronavirus bengakuphiwanga bazaqhubekela phambili ngokukhalala umsebenzi.
Umgcinisihlalo walinhlanganiso esibhedlela seUnited Bulawayo Hospital umnunzana Antony Majongosi uthi inani labantu abafayo liyaqansa ezibhedlela.
“Lamuhla siku day 69 siku strike sethu njalo siyaqhubekela phambili. Khathesi ezibhedlela siyabona ukuthi abantu bayafa kakhulu ngendaba yokuthi akula ma nurse. Kulaba abalutshwane bayahamba kuma quarantine centres so kucina kungela ozakhangela izigulane. Kodwa thina lokhe siqhubeka nge strike sisithi sifuna imali ekwanayo kanye le PPE.”
Umnumzana Zibusiso Gumede ongumhlali wakoBulawayo uthi umumo osesibhedlela wenziwa yikuba uhulumende kaqakathekisi impilakahle yabantu.
“Indaba leyi ma siyikhangelisisa kahle kahle, ngibona engathi yindaba yama priorities a misplaced. Ngoba i government ilakho ukuthi iholise abanye abantu njengama war veterans labanye engingeke ngibaqambe imali ezinkulu ezedlula laba onurse abayibo abaphethe impilo zabantu njalo behluleka ukuthi iba provider i personal protective equipment. Okunye aso ndaba yokuthi imali ayikho kodwa yikuthi bayakuqakathekisa ukuthi abantu bethole usizo ezibhedlela. Bengakuqakathekisa konke kuzaba right.”
Unkosikazi Alice Ncube esinye njalo isakamuzi sakoBulawayo ukhonona ngosizo abaluthola ezibhedlela.
“Okusezibhedlela kunzima, siyahamba kodwa usizo esilutholayo alweneli ngoba omongikazi balutshwane ezibhedlela. Ukuthi basikhangele ngendlela eqondileyo esiyikhangeleleyo kuba nzima kibo ngoba abantu abagulayo bebanengi bona bebalutshwane. Khathesi kunje kunje kule Coronavirus sesizabulawa yikungatholi usizo ezibhedlela.”
Laloba uzulu ekhala ngesimo sezibhedlela umqondisi wesibhedlela seMpilo usikhwicamfundo Solwayo Ngwenya wenqabe ukuthatshwa ilizwi kodwa utshele intathelizindaba ye Studio 7 ukuba bayazama ukusiza uzulu ngabonabo abongi abakhona esibhedlala.
Unkosikazi Jasimine Toffa olilunga le komithi yedale lephalamende kwezempilahla uchaze ukuba bebengakaze bakhangelisise udaba lwabongi. Lokhu kungesizatho sokuba abongi bebengakethuli izikhalazo zabo phambi kwekomiti njalo okwakhathesi idale lephalamende livalile.
Umphathintambo wezempilakahle uMnu. Constantino Chiwenga, ongomunye wabasekeli bakamongameli, utshele izakhamizi zeGuruve ngeviki ephelileyo ukuthi abezempilakahle abakhalala umsebenzi kumele baphenduke emsebenzini ukuzosiza imphefumulo ngesikhathi uhulumende esakhangela izikhalazo zabo. UChiwenga wengeza ethi uhulumende uyazazi izikhalazo ezikhangelane lezisebenzi zezempilakahle.
Your browser doesn’t support HTML5
Udaba lwabongi abalokhe bekhalala umsebenzi siluphiwa nguBathabile Masuku