Uhulumende usekhuphule iholo lezisebenzi kulandela ukutshengisela emigwaqweni kwamasotsha, abongi lamadokotela bekhonona ngokwehliswa kweholo labo bengatshelwanga ngumqhatshi.
Uhlangothi olubona ngokusetshenziswa kwemali yelizwe luthi iholo lezisebenzi selikhuphuke ngokuphindiweyo njalo yafakela izisebenzi imali yokuzivikela kumkhuhlane weCorovavirus COVID-19.
Uhlangothi lolu lwethule umbiko lo amasotsha esenza santando eKwekwe lapho okukhanya engani uMongameli Emmerson Mnangagwa ugxhile khona.
“Phezu kweholo eselikhuphukile izisebenzi sizanikwa iUSD75.00 eyeCOVID-19 allowance kuthi njalo abathatha ipentsheni bazathola iUSD30.00 ngenyanga eyeCOVID-19 allowance.”
Uhulumende uthi uzahlolisisa okungenzakala kuluhlu lwendleko zayo – ibudget – kulandela ukukhuphula iholo lezisebenzi lokubapha iCOVID-19 allowance.
Lokhu kulandela ukutshengisela emigwaqweni okwenziwe ngamasotsha avimbe abantu ukuthi bayesebenza njalo benze lokunye abakufisayo edolobheni lakoBulawayo izolo njalo lokutshengisela kwabongi labongikazi eParirenyatwa Hospital akade bekhala ngokuphungulwa kweholo labo kungelangcazelo.
UMnu. Enock Dongo, okunhlanganiso yeZimbabwe Nurses Association, uthi ezinye izisebenzi ezahola imali efika inkulungwane eziyisithupha zamadola ngenyanga ephelileyo, zithole ingxenye yeholo ngoLwesithathu.
UDongo uthi izisebenzi zicaphulwe yilokhu zangena emigwaqweni njengamasotsha.