Umhlangano omkhulu wenkokheli yeSADC oweOrdinary Summit uqhitshwe ngoMvulo eVictoria Falls uzulu esithi ukhangele ukuthi okwethulwe kuwo kuzanceda abantu makhaza.
Kodwa-ke bakhona abathi umhlangano lo ubujonge ukuthi inkokheli yeSADC ihlangane ikhulumisane ngenhlupho ebhekane lazo loba nje kungasoze kuncede uzulu. Bathi kababoni njalo inkokheli le ithuthukisa umnotho loba inhlalakahle kazulu ngokusebenzisa imvelo esemazweni eSADC njengalokhu okutsho isihloko somhlangano lo.
Zikhona izizalwane zeZimbabwe ezicabanga ukuthi umhlangano lo uzakwenza ukuthi inkokheli yeSADC iqhube ngamandla uhlelo lokwabela uzulu umnotho ngendlela okwenziwa ngayo kwele Zimbabwe.
Zithi kuyenzakala ukuthi uMongameli Robert Mugabe uzazama ngamandla ukuthi eyinye inkokheli yeSADC isebenzise uhlelo lwe Zimbabwe lokwabela abansundu amashares amankampani emazweni.
Ngaphansi kohlelo lolu, amankampani emazweni kumele athengisele abantu makhaza amashares edlula okuyisilinganiso sokungamatshumi amahlanu lanye – 51 percent.
UNkosikazi Sherley Kapuyanyika Matundu, okunhlanganiso ye Christian Legal Society, uthi ubona angani uMongameli Mugabe uzasebenzisa amandla akhe njengomgcinisihlalo weSADC ukuthi abanye bakhe badonse laye kuhlelo lokwabela uzulu okutholakala kwezemvelo.
Uthi inkokheli le kayisose yephule inhliziyo kaMongameli Mugabe ngokwala ukuthi yenze inhlelo zokuthuthukisa inotho kazulu kulandelwa okwenziwa kwele Zimbabwe.
UMnu. Japhet Moyo, unobhala jikelele weZimbabwe Congress of Trade Unions kavumelani laye. Uthi inkokheli le ibizixoxela nje kungelalutho oluzaphuma emhlanganweni lo.
UMnu. Godwin Phiri okunhlanganiso yabasakhulayo ebizwa yikuthi yiINTCHA uvumelana laye. Uthi kudingakala imali enengi yokuqhuba inhlelo ezifunwa nguzulu emazweni la.Kodwa-ke uNkosikazi Matundu uthi ulethemba lokuthi inkokheli yeSADC izasebenza ngamandla ukuthuthukisa umnotho kazulu.
Amazwe eSADC adinga imali engaba ngamabillion angamakhulu amahlanu amadollar- $500 billion yokusungula uhlelo lwayo lweInfrastructure Development Master Plan. Ukuthi izavela ngaphi limali akwaziwa.
Your browser doesn’t support HTML5
Udaba Esilwethulelwe NguGibbs Dube