Owayengumongameli weZimbabwe, uMnu. Robert Mugabe, kasoze ahambe emkhosini wokugcoba ozathatha isikhundla lesi lamuhla enkundleni yeSports Center eHarare.
Uhulumende ubika ukuthi uMugabe utshele uMnu. Emmerson Mnangagwa ukuthi udiniwe ngakho kasoze abekhona emkhosini lo lomkakhe, uNkosikazi Grace Mugabe.
Kukhangelelwe ukuthi kuzabe kulenkokheli yakwamanye amazwe lezinye iziphathamandla emkhosini lo.
Kubikwa ukuthi lomkakhe, uNkosikazi Grace Mugabe obefuna isikhundla lesi, laye unqundekile emzimbeni kulandela okubehleleyo lomkakhe.
UMnangagwa uncediswe libutho ukuthi asuse uMugabe esikhundleni kulandela ukuxotshwa kwakhe esikhundleni somsekeli kamongameli.
Wabaleka waya kwele South Africa esanda kuxotshwa kuhulumende nguMugabe kodwa wathembisa ukuthi uzaphenduka azemsusa embusweni.
Kusenjalo, kubikwa ukuthi kulabantu asebengene ezindlini lemapulazini abantu abagoqela uNkosikazi Bona Mugabe Chikore labanye abasekela uMugabe.
UMnangagwa wethule umbiko wokuthi abantu akumelanga benze ubudlwangudlwangu phezu kwalokho osokwehlela abakucele leZanu PF elibizwa ngokuthi yiGeneration 40.