UMongameli Emmerson Mnangagwa ubika ukuthi owayengumongameli uMnu. Robert Mugabe usehlale phose inyanga ezine esibhedlela kwele Singapore.
UMnangagwa, owethule umbiko lo ngoMvulo, uthe uMugabe usesila kulandela ukuhanjiswa kwakhe elizweni lelo lonyaka ngoMabasa.
“Ngiyathaba ukwethulela ilizwe ukuthi owayengumongameli usengcono nxa sikhangela ukuthi usekhulile.”
UMnangagwa uthe uhambise iqula leziphathamandla zikahulumende eSingapore ababalisa unobhala wohlangothi lukamongameli leziphathamandla zelizwe, uDokotela Misheck Sibanda, udokotela wakhe uProfessor Jonathan Matenga, uAmbassador Isaac Moyo, osebenza ewofisini kamongameli, labanye ukuthi bayembona eSingapore.
“Engikuphiwe liqula leli kuyathokozisa ngoba kuveza ukuthi owayengumongameli osesibangcono kakhulu. Kukhanya engani imithi imsebenzela kahle.”
UMnangagwa uthe inkokheli yamabandla okholo lweSiKhristu kumele ikhulekele uMugabe edlula amatshumi ayisificamunwemunye – 94.
Uthe uMugabe ubezwakala ethokozile njalo kukhanya engaphuma esibhedlela ngesikhatshana esilandelayo.
“… Nxa engaphuma esibhedlela sizabe sesimelele ukuthi simcede ngokutshiyeneyo okunjengo kumhlangabeza lokumkhangela eselapha ukwenzela ukuthi sibone ukuthi uyathola amaphilisi. Sizamcedisa aze asile.”
UMnangagwa wahluthunela uMugabe intambo zombuso ngomnyaka ka2017 encedisana lebutho leZimbabwe elathi lifuna ukususa abantu abasebephambanisa umongameli emsebenzini wakhe.
UMnangagwa wancintisa ukhetho lukamongameli nyakenye wanqoba ngedlela eyechothozwa ngamabandla aphikisayo athi weba amavoti kazulu.