Izizalwane zeZimbabwe ezidabuka eMatabeleland leNkabazwe zimanyane leza KwaZulu eJohannesburg ngoLwesithathu bevalelisa iNdlovukazi uShiyiwe Mantfombi Dlamini Zulu, obebambe isikhundla seNkosi yaKwaZulu ngesikhathi kulungiselelwa ukuyambeka KwaZulu.
Abanye abantu abavalelise iNdlovukazi uShiyiwe Mantfombi Dlamini Zulu. (Photo: Thuso Khumalo)
Imiculo ibihaywa ngamakhulu amabutho, izintombo lozulu jikelele ngesikhathi isidumbu seNdlovukazi uMaDlamini sithwele yizimota ezimbalwa ebezisiya KwaZulu.
Bebephume ngobunengi abaKwaZulu egiya kuluthuli amabutho amanina lawo atshaya impululu kuyindlela yokuvalelisa umkhokheli wabo.
Ukubhubha kweNdlovukazi kutshiye abanengi bemangele njengoba ubesanda kufakwa esikhundleni senkosi ebambele inkosi ezakhethwa kulandela ukutshona kweNkosi yaKwaZulu uGoodwill Zwelithini.
Bavalelisa iNdlovukazi uShiyiwe Mantfombi Dlamini Zulu. (Photo: Thuso Khumalo)
Induna yakwaMthwakazi kwele South Africa, uThulani Jubane, obekhona kuvaleliswa iNdlovukazi eGoli, uthi isizwe sakwa Mthwakazi silahlekelwe kakhulu ngoba siyisizwe sinye lesaKwaZulu.
Umgcinisihlalo wenhlanganiso yeZimbabwe Community in South Africa, uMnu. Ngqabutho Mabhena, laye ubekulo umbuthano emele izizalwane zeZimbabwe kwele South Africa.
Isizalwane seZimbabwe, uNkosazana Thandi Nkomo, laye ubekhona ekhala ndawonye labaKwaZulu.
Abanye abavelelise iNdlovukazi eJohannesburg. (Photo: Thuso Khumalo)
Okhokhela induna zaKwaZulu eGoli, Induna uKheswa, uthi ukulahlekelwa zinkosi zilandelana yisehlakalo esibuhlungu kakhulu kusizwe sonke.
Kubikwa kulokudonselana esikhosini KwaZulu ngodaba lokwatshiwa kwelifa lenkosi uZwelithini ngesikhathi kusaqhutshwa uhlelo lokulungiswa koMntwana ozathatha ubukhosi beNkosi uZwelithini.
Indlovukazi uMaDlamini ukhangelele ukungcwatshwa ngoLwesine ebusuku KwaZulu.
Your browser doesn’t support HTML5
Udaba Esilethulelwe NguThuso Khumalo