Bekugcwele amapholisa lamasotsha ngoMvulo edolobheni leGweru lapho obekumele amalunga ebandla leMDC atshengisele emigwaqweni ekhonona ngokugugudeka komnotho osokusenza ukuthi abantu baphile nzima.
Amapholisa athe ukutshengisela lokhu bekuzakwenza ukuthi kubelodlakela eGweru njengalokhu okwakuthiwa kuzakwenzakala eHarare lakoBulawayo lapho okuvinjwe ukutshengisela okufanayo.
Omele iGweru Central edale lephalamende, uMnu. Brian Dube, uthi ibandla lakhe licine liyekela ukutshengisela emigwaqweni ngoba bekugcwele amapholisa lamasotsha abetshaya itoyi-toyi edolobheni leli kusukela ekuseni.
UDube uthi bacine njalo bengayi emthethwandaba ukuyaphikisa isinqumo esithethwe ngamapholisa esokuthi akumelanga batshengisele emigwaqweni.
Kubikwa ukuthi amapholisa asemise njalo ukutshengisela okuzakwenziwa ngamalunga ebandla leli eMasvingo obekuzakwenziwa ngoLwesithathu.
Kusenjalo, uMnu. Sibusiso Moyo, umphathintambo kahulumende welizwe leZimbabwe obona ngokudlelana lamanye amazwe, uthi kulungile okwenziwa nguhulumende ovimba ukutshengisela emigwaqweni okwenziwa ngamalunga ebandla leMDC elikhokhelwa nguMnu. Nelson Chamisa.
Your browser doesn’t support HTML5
Ingxoxo Esiyenze LoMnu. Brian Dube