EleZimbabwe limanyane lamanye amazwe omhlaba ngoMvulo ukunanza ilanga lokulondolozwa kokuthula emhlabeni eleInternational Peace Day, emkhosini oqhutshelwe edololobheni leChinhoyi lapho uhulumende akhuthaze ukuthi udlakela kufanele luphele elizweni ukwenzela ukuthi kube lentuthuko.
Isiphathamandla somanyano wamazwe omhlaba owe United Nations eZimbabwe uMnu. Bishow Parajuli ufunde umbiko walumanyano kulumbuthano, okhuthaze ukuthi amazwe omhlaba asebenze ndawonye ukuqeda udlakela olukhona ezigabeni ezinengi zomhlaba.
Ngakwelinye icele, inhlanganiso elwela amalungelo oluntu eyeHeal Zimbabwe Trust ichothoze abatsha bebandla leZANU PF ngodlakela olubikwa luqhamuke emathuneni eHeroes Acre ngempelaviki kungcwatsha owayeyisiphathamandla salelibandla umuyi uMnu. Sikhanyiso Ndlovu.
Inhlanganiso le iphinde yagcizelela ukuthi kufanele uhulumende asebenzelane lenhlanganiso ezizimeleyo ukulondoloza ukuthula elizweni.
UMnu. Ambrose Sibindi, isiphathamandla senhlanganiso elwela amalungelo ezisebenzi eye Zimbabwe Congress of Trade Unions, uthi akula kuthula elizweni ngoba udlakela lokhe luqhutshwa ngendlela ezitshiyeneyo.
Lokhu ukutsho lasemkhosini owenziwe ngempelaviki yinhlanganiso le owokunanza ilanga lokuhlukuluzwa kwamalunga ayo eminyakeni edluleyo.
Your browser doesn’t support HTML5
Ingxoxo LoMnu. Ambrose Sibindi