Idale lephalamende liqhubeke ngomsebenzi walo ngoLwesibili kulandela ukuvulwa kwalo ngeviki ephelileyo lapho umongameli Robert Mugabe abala khona umbiko ake awufunda, okubangele ukuthi achothozwe ngamabandla aphikisayo esithi useluphele njalo kasenelisi umsebenzi.
NgoLwesibili amalunga ebandla leZANU PF abonge uMongameli Mugabe ngombiko oqondileyo owethulwa ngemva kwalesi isehlakalo, njalo akhuthaza lelidale ukuthi lihlolisise imithetho yama bills engamatshumi amabili lanye-21 okufanele idindwe isebenze ngokusemthethweni, okuyiwo umlandu walelidale ngalelihlandla.
Kodwa umsekeli kamkhokheli webandla leMDC-T uNkosazana Thokozani Khuphe utshele lelidale ukuthi inengi belikhangelele ukuthi umongameli Mugabe uzachasisa ukuthi uhulumende uzadala njani imisebenzi, kanye lezinye inhlelo zokuqeda ukuhlupheka kwabantu elizweni.
Ummeli weBinga North kulelidale uMnu. Prince Madubeko Sibanda uthi okudanisileyo yikuthi amanye amalunga ebandla lakhe ebengalambiko kamongameli umhlangano uqalisa, okubangele ukuthi umkhokheli wamalunga eMDC-T kulelidale akhalaze kusikhulumi salelidale ukuthi ingxoxo-mpikisano yama bills imiswe wonke umuntu aze azuze lolugwalo.