Zithithibele izakhamizi zePelandaba, eKhumbula lezinye indawo eTsholotsho esabelweni seMatabeleland North, okulezanuse ezibizwa ngokuthi ngotsikamutanda abakhipha izinto ezesabekayo ezindlini zabantu.
Benza lokhu ngesikhathi ilizwe liphansi kohlelo lokuvalela abantu ezindlini olweLockdown kusenzelwa ukuvimba ukumemetheka komkhuhlane weCOVID-19. Abanye bayakusola lokhu besithi kumemethekisa umkhuhlane lo kubelabanye abathi izanuse lezi zenza umsebenzi omkhulu.
Abatholakala belemithi okuthiwa ngeyokuloya bahlawuliswa imali, imbuzi, inkomo, amadonki lokunye okutshiyeneyo. Ilizwe leZimbabwe lihti ukuloya yinto eyenziwa ngabanye abantu kodwa akumelanga abantu batshele abanye ukuthi bayaloya.
Lokhu kumumethwe kumthetho oweCriminal Law (Codification and Reform) Act kuChapter 9:23, Section 99 (1).
Ukuze sihlaziye udaba lolu, sixoxe lobaba oziveze ngokuthi nguBhebhe, omele izakhamizi, uMnu. David Mhabinyana Ngwenya, inyanga elodumo, uMnu. Davies Ndlovu odabuka eTsholotsho, legqwetha elilwela ilungelo likazulu, uMnu. Matshobana Ncube.
UBhebhe uthi abantu bayakuthazelela okwenziwa yizanuse lezi kodwa uNdlovu uyakuphikisa lokhu esithi kuxabanisa abantu.
UNgwenye uthi lakudala kwakusenziwa ukudinga abathakathi njengalokhu okwenziwa yizanuse lezi eTsholotsho.
Kodwa uNcube uthi akukho emthethweni ukwenziwa yizanuse lezi ezivela eMashonaland.