Otsheketsha abanengi okugoqela labeZimbabwe abavaleleke emgodini wegolide eStilfontein esabelweni seNorth West kweleSouth Africa bazadlalela ikhefu leKhisimusi besemgodini ngoba uhulumende wehluleka ukubahlenga kulandela imbiko ethi bahlome okwesabekayo.
Lusizi lodwa emulini zeZimbabwe ezilezihlobo ezingotsheketsha osekulezinyanga besemgodini omdala eStilfontein. Inengi labotsheketsha laba bebengene kulo umgodi ukuze imuli zabo zibe leKhisimusi ehlabusayo kodwa liKhisimusi isiphenduke yababa gamu, njengoba bezayidlalela phansi emgodini.
Isizalwane seZimbabwe uNkosazana Linah Minyizeya, ulabantwana ababili - uTinashe loTawanda - abaphakathi kwalo umgodi. Yena-ke utshelwa ngamathe nxa ezama ukuchaza ubuhlungu abuzwayo uma ecabanga ukuthi ingane zakhe lezi zizadlalela iKhisimusi phansi emgodini.
“Abafazi bakhona bayafona everytime bebuza ‘Amadoda ethu akuphi mama?’ Ngiyabatshela everytime ukuthi bazobuya, thula bazobuya. Nami ngikhathazekile nabo bakhathazekile.”
Esinye isizalwane seZimbabwe uMnumnzana George Dube laye ovumayo ukuthi uyayewenze lumsebenzi wokutsheketsha kodwa khathesi ophandle uthi kusemandleni amapholisa ukuhlenga otsheketsha laba.
“Ampholisa yiwo avala umgodi. Ababakhiphe laba bantu kulo umgodi ngoba sonke senza lokhu ngoba sifuna ukuzizamela impilo.”
Isizalwane sakweleSouth Africa uNkosazanana Thandeka Zinzi Tom laye uthi ukhathazeke kakhulu ngomfowabo ozadlalela ikhisimusi emgodini.
“Ngumuntu engimazi ukuthi uhamba abuye but now it’s been 5 months akakaphumi. Can you imagine wena within 3 hours ungafumani ukutja ungafumani manzi ufeeler njani? In that moment can you just imagine kuleya ndawo abakuyo, bafeeler njani?”
Uhulumende lamapholisa bathi otsheketsha laba bakhululekile ukuziphumela loba yisiphi isikhathi kodwa abakwenzi lokhu ngoba besesaba ukuthi bazabotshwa. Kodwa omunye wenkokheli zomphakathi eStilfontein uMnumnzana Johannes Qankase uyakuphikisa lokhu esithi okwenza bebebalutshwana abaziphumelayo yikuthi ukuphuma lapho kunzima njalo inengi liyagula lokuswela amandla njengoba amapholisa evumela ukudla okulutshwana kakhulu ukungena emgodini lo.
UQankase uzonde ugan’unwabu esithi uhulumende wakhuluma amanga etshela umhlaba ukuthi uselohlelo lokuhlenga otsheketsha laba.
“Bathule. Bahleli abantu bona behlukumezeka ezanzi. And kune 14 ephumileyo laphaya emgodini ibaxelele ukuthi isimo sibi. Isimo simangxongo ngaphansi lapha. Abantu bayafa, abantu bayagula, abantu balambile. Kodwa kuyabonakala sengathi uhulumente akayithatheli Ngqalo leyonto. Uyibona sengathi yistory esenziwa ngabantu.”
UMnumnzana Dumisani Nleya, isizalwane seZimbabwe njalo engumkhokheli wenhlanganiso elwela amalungelo eZizalwane zeZimbabwe eyePhoenix Foundation of Zimbabwe, uthi bakhathazekile kakhulu.
“Kubuhlungu njalo sicela all over the world kubo Amnesty International ingathi bangangenelela. United Nations lapho elikhona siyacela lani ukuthi lisicelele. Siyakusola okwenziwa nguhulumende weSouth Africa ukuthi abantu badlele ukhisimusi ngaphansi komhlaba. Ma bengabe belamacala abakhitshwe bahambe ezinkantolo zibathole belamacala behanjiswe ejele.”
Usikhomitshi wezamapholisa uGeneral Fannie Masemola usanda kutshela abezindaba ukuthi uhulumende akakalulahli uhlelo lwakhe lokuhlenga otsheketsha laba kodwa usadinga imali yokubhadala inkampani ezaqhuba umsebenzi wokuhlenga lo.
SEE ALSO:
Udaba Esilwethulelwe NguThuso Khumalo