Osomabhizimusi bakwele Zimbabwe labakwele Melika abaqale umhlangano wabo ngoMvulo eHarare, oweZimbabwe-US Business Forum, bathi bafisa ukuqheliswa okwezinga laphezulu kobudlelwano phakathi kwabasomabhizimusi bamazwe womabili.
Lokhu kuphume emhlanganweni omkhulu oqoqwe luhlangothi lukahulumende olweZimbabwe Investment Development Agency (ZIDA) ohlose ukuba kuqheliswe ubudlelwano phakathi kwamabhizimusi amazwe la womabili.
Okhokhela iZIDA uMnu. Busisa Moyo uthe kuyadanisa ukuba eleZimbabwe lilokuthengiselana okuphansi kakhulu lele Melika lona elilomnotho olesisindo esikhulu emhlabeni jikelele.
UMoyo uthe bahlose ukuba amankampani akwele Melika amukele lokho okwenzakala eZimbabwe ukwenzela ukuba bazetshala imali elizweni.
“Sifuna osomabhizimusi ukuthi bafaka imali kumabhisimusi ase Zimbabwe ukuba baqhelise amabhizimusi kuleli. Balande ukuzelungisa ukuba singathengani labo bengathengani kuleli’’
Uqhubeke esithi kuminyaka esanda kwedlula eleMelika belingazimisengalanga ukutshala imali kuleli ngenxa yamazwi amabi akhulunywa ngabanye abantu mayelana lokwenzakala eZimbabwe.
“Ukukhulumisana kwethu lele Melika ungathi kuyancibilika sifisa ukuba kuphumelele sithuthukise eleZimbabwe.’’
Usomabhizimusi wakwele Melika omele amankampani ekunhlanganiso yeAtlanta Black Chambers eyeMelika osembuthanweni lo, uMnu. Richardo Berris, uthi bafuna ukuzwa ngamathuba amabhizimusi kwele Zimbabwe.
“Besisizwa abakhuluma ngokulapha eZimbabwe. Sisizwa lakumeli wakwele Zimbabwe. Siqhubeke phambili sithemba ukuba kukhona okucacayo okuzaphuma phakathi kwamazwe ethu.’’
Ummeli weZimbabwe kwele Melika uMnu. Tadeous Chifamba uthi bathemba ukuba osomabhizimusi bakwele Melika bazathola intshukuntshu yokuzetshala imali elizweni ngemva kokuthola ulwazi oluzaphuma kulumhlangano.
“Sitshilo ukuba kulobudlelwano obukhulu. Besiphazamiswa zindaba eziphuma kuntatheli ezokuba ele Zimbbawe kalifuni abazotshala imali besuka kwele Melika’.
’Eminyakeni elitshumi eyedluleyo eleMelika lele Zimbabwe athengiselane impahla engaba lesisindo sokuyizigidi ezifika amakhulu ayisithupha zamadola eMelika – US$600 million, okuyisisindo esibikwa siphansi kakhulu.Iqula labosomabhizimusi abasuke esigabeni eseGeorgia kweleMelika, libikwa liqale ukuya kwele South Africa, kumalanga asanda kwedlula. Lisuka e Zimbabwe leli qula likhangelelwe ukuya kwele Zambia lingakagqibi uhambo lwalo emazweni awezwekazi leAfrica.