Unobhala jikelele webandla leZanu-Pf, njalo engumgcinisihlalo wenhlanganiso yamabandla ezombusazwe ayiwo alwela inkululeko yamazwe awo embusweni wabamhlophe, eyeSecretaries General and Wing of Former Liberation Movements of Southern Africa ngoMvulo utshele onobhala balumhlubulo, ukuba amazwe la aqhubekela phambili encindezelwa ngamazwe entshonalanga, agoqela eleMelika ukwenzela ukudala ingxabano phakathi kwezwekazi leli.
UMpofu wethule lamazwi evula umhlangano wabonobhala laba, esipha umzekeliso ngempumela yophenyo olwenziwa ngabe SADC Electoral Observation Mission luholwa ngowayengumsekeli kamongameli wakwele Zambia, uMnumzana Nevers Mumba yena owaveza ukuba kukhetho oluqhutshwe eZimbabwe nyakenye lwabalezigwenxa ezigoqela ukuhlukunyezwa kwabantu lokwephulwa kwamalungelo oluntu.
UMpofu uphinde wasola uMumba lequla lakhe esithi babethengwe ngamazwe afana leMelika emizameni yokugenqula ibandla leZanu-PF.
“Ababhidlizi bentshonalanga laba sebedunge umhlaba bezithi bangongcwelengcwele njalo yibo abadala izimpi zomhlaba ezenzakalayo,” kutsho UMpofu.
“Uphenywana luka Mumba lwenzelwa nje ukusigcona besetshenziswa yilaba, ngakho yikho ngithi kufuze sibaqaphe laba ngelokhozi, njalo sibambane kulokhu.” \Kodwa ephendula kulinkulumo, owayelilunga lephalamende ekubandla leCitizens Coalition for Change eBinga, uMnumzana Prince Dubeko Sibanda, uyakulandula lokhu esithi inengi labantu emazweni abuswa ngamabandla abalwa impi yenkululeko bakhathazekile ngombuzo walamabandla, ikakhulu eZansi yezwekazi leAfrica.
“Abantu beZimbabwe yibo abathi iZanu-PF siyehlulekile ukubusa,” echazaOkukhulunywa ngoObert Mpofu ukuthi siyabhadalwa ekuthini sigenqule ohulumende kayisikho, bona ngokwabo indlela ababusa ngayo leye ANC yiyo enza abantu bethi kabaphume embusweni.”
UMnumzana Effie Dlela Ncube okunhlanganiso yeNkayi Community Parliament laye uthi akulaqiniso okwethulwe nguMpofu labanye abakhokhela amazwe atshiyeneyo awezwekazi leAfrica.
“Abantu bayabona, bafuna inkululeko, imsebenzi ilizwe lihlale kahle,”kutsho uNcube.
“Bayakha amaqembu ukuthi ilizwe libengcono kulalelo eliyabe lisesihlalweni. Kanti amaqembu aphikisayo ayadingeka, enza kuhlanzeke kohlonitshwe lelungelo labantu aveze njalo lenkohlakalo kuhulumende.”
Ongunobhala webandla leAfrican National Congress, uMnumzana Fikile Mbalula, usole kakhulu amazwe ayencidenzele abensundu bezwekazi leAfrica ethi yibo njalo abaphezu kwezimpi zase Palestina, okwenzakala kwele eSudan, Mali, DRC, Zimbabwe lakwamanye amazwe.
“Sibona lodlame lokubulalana eMozambique okufuze silunqobe njalo siqhubeka siqhubeka sikhankasa ngezigwebo zama sactions enzeka eZimbabwe ukuba zesulwe.”
Umhlangano lo ohamba phansi kwendikimba ethi Unity Collaboration and Defence of Our Liberation Gains Against Neo-colonialism uhlose njalo ukuhlomisa amaqembu kazibuse azaphatheka ekhethweni lwalonyaka emazweni agoqela eleSouth Africa, Namibia, Tanzania kanye leMozambique abangakwenza ukuvimba uncidezelo ngesikhathi sokhetho.
UMpofu uthi njengamabandla enkululeko, sebegqibe ukwakha isikolo sezombuso eseMwalimu Julius Nyerere Leadership School kwele Tanzania njalo abangane babo abakwele China babasiza ngokwakha isiphala senkulululeko eseMuseum of African Liberation esigodlweni esise Harare.