Ngqwele Dube
Omalayitsha baziwa kakhulu ngokuba yizigilamkhuba emigwaqweni.
Kulabathethisa labatshaya abagada izimota zabo labanye abenza okunye okungathakazelelwa nguzulu. Kodwa bakubone kufanele ukuba bekulungise lokhu.
Bebethe gwaqa enkundleni yemidlalo eTsholotsho bedlala umdlalo wenguqu besenzela ukuxoxisana ngokuphatha abantu njalo lokusebenza bebambene.
Bekuthunqa uthuli enkundleni yeTsholotsho Business Centre ngoLwesithathu lapho omalayitsha abangamatshumi ayisithupha - 60 akade bebumbe amaqembu amane banqikilana kumdlalo wenguqu.
Omalayitsha laba abagoqela abahlala eTsholotsho lePlumtree bathi sebeleminyaka emithathu behlangana betshova inguqu. Omunye wabaqoqi walomdlalo lo, uMnumzana Sherperd Bhule, uthi badinga indlela yokwakha ubudlelwano.
“Sabona kuqakathekile ukuthi siqinise ubudlelwane njengabo malayitsha bendawo ezehlukeneyo ngoba bekulo kulwa phakathi kwethu kodwa sabona kungcono ukuthi siphathisane loba omunye engaba lenkinga emigwaqweni siyabe siya ncedisana”
UBhule uthi kodwa akudlalelwa amahala ngoba iqembu linye ngalinye likhipha inkulungwane ezimbili lengxenye zama rand eSouth Africa – R2,500 efakwa engcebethini.
“Amateam akhipha 2,500 rands each kuthi ewinayo ithola 7,500 rands then edliwa ku-final ithola 2,500. Eziphuma kuma semifinal azitholi lutho.”
UMnu. Cornelius Nkomo oyisakhamuzi seTsholotsho uthi kuyajabulisa ukubona omalayitsha bebambene kungela budlwangudlwangu.
“Siyakujabulela ukuthi omalayitsha bebambane kanje bejabula kungela kulwa phakathi njalo abantu begcwele bezobukela bezikholisela”
Omalayitsha laba basebenza kakhulu eMatabeleland lapho abathwala khona impahla etshiyeneyo abayithwala besuka kumbe besiya kweleSouth Africa.
SEE ALSO:
Udaba Esilwethulelwe NguNgqwele Dube