Ibandla eliphikisayo eleZapu ngoLwesibili lithumele isiphathamandla salo ukuyahlangana lomeli wakwelePalestine eZimbabwe uMnu Tamer Almassri bekhulumisana ngempi eqhubekayo eGaza Strip phakathi kweleIsrael leqembu leHamas.
Isikhulumeli salelibandla uMnu Richard Gandari wethulele uAlmassri umbiko ovela kumkhokheli weZapu uMnu Sibangilizwe Nkomo owokuxhasa elePalestine ngesikhathi izizalwane zalo ezinengi zisifa ngenxa yalimpi.
Kumbiko lo uNkomo ubuthembisa uAlmassri ukuthi ibandla lakhe lima lePalestine njalo esithi bafuna ukuba i-Israel ime ukuhlasela esihlengeni seGaza ngoba ibulala abantu makhaza.
UNkomo utshele iStudio 7 ukuthi okwenziwa ngeleIsrael ngumbuqazwe ofana loweGukurahundi, lapho ibutho likamuyi uRobert Mugabe elahlasela khona eMatabeleland laseMidlands labulala abantu abedlula inkulungwane ezingamatshumi amabili, 20,000.
Your browser doesn’t support HTML5
Ingxoxo loMnu Sibangilizwe Nkomo
Kodwa eleIsrael lithi libulala amalw’ecatsha eHamas ngemva kokulihlasela ngoMfumfu abulala futhi athumba izizalwane zalo ezinengi. Lanxa ezinye sezakhululwa, ezinye zilokhe zingaziwa ukuthi zingaphi lokuthi ziyaphila na.