Ngesikhathi kulokufuthelana phakathi kwele Zimbabwe lele Zambia, eleMelika liyavuma ukuthi seliqinise ubudlelwano lelizwe leZambia kwezomvikela.
UMongameli Emmerson Mnangagwa wakhonona ngobudlelwano lobu emhlanganweni awenza lomkhokheli weRussia, uMnumzana Vladimir Putin, ekuqaleni kwayonale inyanga.
Usibalukhulu webutho leU.S-Africa Command, kumbe AFRICOM ngamafitshane, uMnumzana Michael Langley uthi ngempela ilizwe lakhe seliqinise ubudlelwano lele Zambia kuhlangothi lwezomvikela. UMnu. Langley ubekhuluma namuhla lentathelizindaba ekupheleni komhlangano we-Africa Chiefs of Defense oqhutshelwe eGaborone.
Kodwa uMnu. Langley uthi noma nje ubudlelwano beMelika leZambia sebuqinile, akusiloqiniso ukuthi bafuna ukwakha inkamba yamasotsha elizweni lelo.
“Akulaqiniso kulokho. Lokuthi sifuna ukwakha inkamba, akula nto enjalo. Sizebenza kuhle leZambia. Sesiqinise ubudlelwano kwezomvikela lezeZambia, kodwa akulamacebo okuba lenkamba. Kodwa seziqinisile sibili ubudlelwano.”
Ukungezwani kweZimbabwe kanye leZambia phezu kwaloludaba sekufinyelele emahofisini awenhlanganiso ye-Southern African Development Community kanye le-African Union. EleZambia yilo eliphanyeke loludaba kuhlanganiso lezi, kulandela inkulumo kaMnangagwa aze ahlangane lomunye wakhe we-Russia uPutin.
UMnangagwa ukhala ngokuthi eleMelika selibambisene labomakhelwane abafana leMalawi kanye leZambia ibanikeza uncedo lwezomvikela, iZimbabwe isele phandle.
Ocubungula ezombusazwe, uMnu. Zenzo Moyo uthi eleMelika lilelungelo lokukhetha amazwe elilobudlelwano lawo.
“Ngicabanga ukuthi eleZambia lilelungelo ukuthi lakhe ubuhlobo lanoma yiliphi ilizwe elifuna ukwakha lalo. EleZimbabwe liyaphazamisa ngokukhona ukuthi kungani eleMelika liqinisa ubudlelwano lele Zambia.”
UMnu. Moyo uthi eleZimbabwe selizibona litshiywe ngaphandle, yikho selikhonona ngelikubona kusenzakala.
“Lokhu sikufanisa lokwenzakala eUKraine lapho eleRussia libona engathi ukuzwana kwe Ukraine leMelika kutsho ukuthi bafuna ukuyilwisa. Ngakho angiboni isizatho sokuthi kungani kumele iZimbabwe ikhonone phezu kwalokhu.”
Kusenjalo, uMnu. Langley uthi eleMelika kanye lamazwe awe Africa kumele alwisane lokungakhulumi iqiniso okwenziwa yiRussia yona ezama ukudala ubungane lamazwe amanengi kuzwekazi leAfrica.
“Okunye okuphume emhlanganweni lo yikuthi amazwe awe Africa athi iRussia ayikhulumi iqiniso yikho icina ingena kwamanye amazwe. Lo ayisiwo mbono we AFRICOM kumbe iMelika, kodwa ngumbono wamazwe awe Africa."
Umhlangano oqhutshwe eGaborone, wona otshiye phandle eleZimbabwe, ubuhlaziya isimo sezomvikela kuzwekazi leAfrica. EleBotswana licele ophethe uhlangothi lwezomvikela esigodlweni seZimbabwe kulelolizwe ukuba angene emhlanganweni lo.
Lokhu kuza ngesikhathi kulokungahlaliseki ikakhulu emazweni angentshonalanga kwezwekazi leAfrica, kulokuhluthuna intambo zombuso libutho ngokungekho emthethweni. EleRussia lizama ukugxila impande emazweni agoqela eleBurkina Faso, Chad, Gabon, Guinea, Mali, Niger lamanye. Lalile nkamba yebutho eNiger esivalwa.
SEE ALSO:
Udaba Esilwethulelwe NguMqondisi Dube