Abenhlanganiso yabodokotela eyeZimbabwe Hospital Doctors Association, bathi sebebhalele uhulumende bemazisa ngenyathelo labo lokukhalala umsebenzi kusukela kusasa ngoLwesibili mhla ka2Mpandula, ngoba uhulumende edonsa inyawo ekulusingisiseni izikhalazo zabo.
Umkhokheli wenhlanganiso le eye ZHDA uDokotela Peter Magombeyi uthi kusukela ngoLwesibili ekuseni, odokotela bezibhedlela zeMpilo Central Hospital, United Bulawayo Hospital, Parirenyatwa leChitungwiza Central Hospital bazakhalala umsebenzi ngoba iholo labo alisabenelisi ukuba baqhubeke besiza emsebenzini nsuku zonke.
Olwela amalungelo oluntu uMnu. Effie Ncube uveza imibono yakhe ngokukhalala umsebenzi kwabodokotela ethi uhulumende kaphathe izisebenzi zakhe ngokufanayo.
''Akumangalisi ukubona odokotela betshengisela bethi bafuna imali ngoba wonke umuntu uyayifuna imali akulamuntu ongasebenzela amahala, akula zinto zokusebenzisa. Wonke umuntu kumele ahole imali eyeneleyo, izinto zikhwelile, akekho osebenzela amahala, uHulumende kalungisele amadokotela laye wonke umuntu osebenzayo.''
Isakhamuzi sakoBulawayo,uMnu Michael Ndiweni uthi uhulumende kaqakathekise ukuthola kwabantu impilo laboDokotela bahole imali ebenelayo.
''Ukukhalala umsebenzi kwabodokotela kuzakuba yingozi empilweni zabantu sikhulumanje akulamithi ezibhedlela ayeneli, nyakenye abantu balahlekelwa yimpilo, uHulumende kaqakathekise kakhulu ukutholisa abantu imithi ezibhedlela aneke adlala ngempilo zabantu.''
UMnu Patrick Ndlovu uthi ukukhalala kwabodokotela kuveza ukwehluleka kukahulumende njalo kalathando labantu.
''Silokudana ngombiko wokukhalala umsebenzi kwaboDokotela ngoba abalamali yokuya emsebenzini, kulihlazo kubonisa uhlupho olubhekane lelizwe. Lokhu kubonisa njalo ukwehluleka kukahulumende kutshengisa ukuba kalathando labantu njalo bahlala bendiza emoyeni bengabuyi lalutho. Kuzafiwa ensukwini njalo kunelamithi siphakathi kobunzima ezweni.''
UNkosikazi Doreen Nare uthi ukukhalala umsebenzi kwabodokotela kuzafaka impilo zabantu engozini.
''Akusoke kubelomehluko bahlala bekhalala umsebenzi, Sicela baye emsebenzini siphile ngoba bengaze bakhalale umsebenzi akulamehluko impilo zabantu zisengozini.''
UMnu. Ndodana Moyo uthi ilizwe liyafa kodwa ubukhokheli belizwe budlalisa imali bethenga izindlu lezimota kodwa abantu bengelamithi ezibhedlela labodokotela bengaholi.
''Samukela umbiko obuhlunu wokukhalala umsebenzi, sibona ukulahleka kwempilo ezibhedlela noba kunelamithi laboDokotela. Okubuhlunu yikuthi ubukhokheli buphuma ezweni impika lamalanga bendiza bedlalisa imali, sibona bethenga izimota lezindlu ezidulayo kodwa kunela mithi labodokotela.''
UMnu Mbuso Fuzwayo olwela amalungelo oluntu uthi ulusizi ngokukhalala kwabodokotela umsebenzi.
''Kulusizi ukuba odokotela bayakhalala umsebenzi kusasa noba abakutholayo kungabenelisi, kuzakuba lusizi kwabaswelayo ngoba bengela mali yokuyakubodokotela abazimeleyo. Uhulumende udlalisa imali yesizwe eyisa kwezebutho lokuncindezeleni abantu kulokuhambisa imali kwezempilo.''
Isakhamuzi sakoBulawayo,uMnu Iphithule Jekwane uthi ezempilakahle ezweni zivele zibhazalele ngesisu, ukukhalala umsebenzi kwabodokotela kuzakwenza isimo sibe sibi ngamandla.
''Ngabenje bayavala ilizwe leli ngoba akulanto esebenzayo, ezempilakahle zivele azisebenzi, ukukhalala umsebenzi kwabodokotela kuzakwenza kubenzima ngamandla njalo odokotela abalampahla lemithi yokuthi basebenze. Lemali abayiholayo ayeneli ukuthi baye emsebenzini, kudineka ukuba ilizwe liluniswe.''
ODokotela bathi bazamile ukukhulumisana loHulumende ngokuba akhuphule iholo labo kodwa akabalaleli ngakho bazaphenduka emsebenzini bengabhadalwa imali abayicelayo njalo ihambelane lesimo somnotho elizweni kusetshenziswa isisindo semali yesilinganiso samabhanga okuthenga imali yakwamanye amazwe.
Odokotela bathi bazamile ukulobela uhulumende kanye lokuphatha imihlangano laye kodwa akalanyathela asethe walithatha kusukela ngomnyaka odluleyo.
Your browser doesn’t support HTML5
Udaba lokukhalala umsebenzi kwabodokothela siluphiwa nguAnnahstacia Ndlovu