Ingcwethi kwezempilakahle zithi kuqakathekile ukuba abantu behlolwe umkhuhlane wokuvaleka isifuba, obizwa ngokuthi yi-asthma.
Umkhuhlane lo olakho ukudalwa zimpoko, uthuli, intuthu lokuba semulini ulakho ukuhlasela umuntu engazi ukuba ulawo. Abalomkhuhlane lo lalabo abalabantwana abazalwa belayo bathi ubathwalise nzima, ikakhulu ngesikhathi samakhaza.
Inhlanganiso yezempilakahle yamazwe omhlaba eyeWorld Health Organisation ithi abantu abayizigidi ezingangakhulu amathathu phose lamatshumi mane - 339 million emhlabeni balomkhuhlane wokuvaleka isifuba njalo ngomnyaka ozayo inani leli lilakho ukukhuphuka lisiya kuzigidi ezingamakhulu amane.
Kwele Zimbabwe umkhuhlane lo uphakathi koluhlu lwemikhuhlane engamatshumi amabili ebulala abantu. I-asthma ikuzinga letshumi lambili njalo umuntu ulakho ukuba lomkhuhlane lo engakwazi ngoba izibonakaliso zawo zinzima ukunanzeleleka. Wabulala abantu abedlula kancane inkulungwane lengxenye - 1,531 ngomnyaka ka2020 eZimbabwe.
Akwaziwa ukuba wabulala abangaki kusukela ngalesos’ikhathi kuze kube namuhla.
UDokotela Edwin Sibanda Mzingwane, ongumqondisi wezempilakahe koBulawayo, uthi kumele umuntu wonke ahlolwe umkhuhlane lo, ikakhulu ngesikhathi samakhaza.
USibanda Mzingwane uthi zinengi izibonele zomkhuhlane lo.
Abahlaselwe ngumkhuhlane wokuvaleka kwesifuba bathi ubathwalise nzima umkhuhlane lo. Isakhamuzi seNkayi, uNkosikazi Nokuthaba Ncube, ngomunye wabakhala ngomkhuhlane we-asthama.
UNkosikazi Agnes Ndlovu owakhele eKezi uthi ingane yakhe yabulawa yi-asthma.
UNkosikazi Nesimo Dube odabuka eGwanda olomntwana olesimo sokudabuka indebe laphakhithi komlomo uthi ingane yakhe iphefumula nzima ngenxa ye-asthma.
Emhlabeni wonke jikelele iZimbabwe ikuzinga lesine lamazwe alabantu abalesifo se-asthma. Inengi linatha amaphilisi okuthiwa yi-prisdone lomunye ofafazwa emlonyeni uma umuntu esezizwa engaphefumuli kuhle. Kusanda kunanzwa usuku lweWorld Asthma Day obelulesihloko esithi kuqakathekile ukufundisa uzulu ngomkhuhlane lo.
SEE ALSO:
Udaba Esilwethulelwe NguAnnhastacia Ndlovu