Abezempilakahle bathi abantwana abazalwa belomkhuhlane wetshukela okubizwa ngokuthi yi-Type 1 diabetes, kumele bethole uncedo masinyane ngoba ulakho ukubabulala besancela.
Bathi kunzima ukuhlolisisa isifo lesi ebantwaneni abasanda kubelethwa.
Umkhuhlane wetshukela obamba abantwana obizwa ngokuthi yi-Type 1 diabetes uhlasela abantwana, ngoba ezelwe umbendeni wakhe ungenelisi ukukhipha abathi yi-insulin ngokunjalo umzimba wakhe uyabe ungenelisi ukwamukela itshukela ukuba lisebenze kahle.
Akwaziwa amanani abantwana abalesifo lesi eZimbabwe loba ingcwethi kwezempilakahle zisithi engaba munye phakathi kwabane abalomkhuhlane lo abawuthelelwa ngabazali. Ingcwethi kwezempilakahle ziqonqosela abazali ukuba bananzelele izibonakaliso zomkhuhlane lo ukuze umtwana athole ukwelatshwa ngokuphangisa. UDokotela Edwin Sibanda umqondisi wezempilakahle kukhansili yakoBulawayo uchasisa ngomkhuhlane wetshukela yabantwana.
“Umkhuhlane wetshukela ohlasela abantwana abancane, ubangelwa yikusweleka kwe insulin emzimbeni wabantwana. Lokhu kwenza ukuba nxa bengavele babanjwe lumkhuhlane baqalisa ngokuzihlaba. Izibonakaliso zomkhuhlane yikulamba masinyane, lokuthambisa kokuphela, ukuhlala usoma unatha amanzi kokuphela kanye lokucikizeka komzimba lanxa esidla kakhulu. Omunye ulakho ukuthi aphele amandla.”
UDokotela Derick Matsika osebenzela koBulawayo esibhedlela seMpilo uthi kunzima ukwelapha umkhuhlane lo ebantwaneni.
"I type one, asila thuba lokuthi si controller nge diet kumbe ngamaphilisi. Sihle siqalise nge injection okunye kulandele from there. Lowu mkhuhlane sithi yi acquired ngoba vele ube layo emzimbeni. Umkhuhlane wetshukela uvele ngakwakho phakathi emzimbeni ube usuphuma usiya phandle.”
Uqhubekela phambili uDokotela Matsika eqonqosela umphakathi ukuba asekele abantwana abagula lumkhuhlane.
“Uhlupho lwe type one yikuthi ngenxa okuthi ubamba abantwana, siyande ukuphuza ukuyibamba. Yikho okwenza ukuba abe type one bengaphili impilo ende njengabagula i type two. Kodwa singaphangisa ukuyibamba siphangise ukuyi controller bayaphila kuhle njengomuntu wonke. Kodwa kuyabe kumele athole umuthi impilo yakhe yonke. Kuqakathekile ukuthi abantwana ababanjwa lumkhuhlane bancediswe ngoba ukuba ngumtwana uzihlaba i injection nsuku zonke, Sithole ukuthi kuyabaphambanisa ingqondo, ukuba phakathi kwabanye abantu kumbe ekuphileni kwabo. Ngakho badinga i support ngekhaya kanye lezikolo.”
UNkosikazi Janet Masuku umzali olomntwana ogula isifi setshukela ulandisa ngendlela umntanakhe asephila ngayo.
“Umtanami wabanjwa itshukela eleminyaka emibili. Khathesi kufanele adle ukudla kwesintu kakhulu, impuphu yamabele, umfushwa, indumba kanye la fruits. Akumela alambe kakhulu kumbe asuthe kakhulu. Ama injection uhlaba ekuseni lantambama. Umuthi uyi USD$15, ama injection wona ethengwa ewodwa.”
Ukutholakala umntwana akutsho ukuthi umuntu kasoze aphile impilo epheleleyo. Abezempilakahle bathi nxa bengalandela imilayo yabo bayanelisa ukungafiki esibangeni somkhuhlane esingenza impilo ibe nzima.
Ngaphandle kokuthelelwana ngokosendo itshukela alithelelwana njengeminye imikhuhlane engalutho ukumemetheka.
SEE ALSO:
Udaba Esilwethulelwe NguBathabile Masuku