UMongameli weBotswana uMnu Ian Khama sesole kakhulu uMongameli Mugabe ngokwehlulaka ukugcwalisa isivumelwano seGlobal Political Agreement esithi okohulumende womanyano nxa kusehlula kumele kwenziwe ukhetho olutsha.
Embikweni awethule ngoLwesihlanu edale lephalamende lelizwe lakhe, uMnu Khama uthe iZanu PF ikhanya ingazimiselanga lakancane ukusebenzelana leMDC kuhulumende womanyano lo.
Ibandla leZanu PF lona lisole kakhulu ukhama ngamazwi akhe. Abamela iZanu PF lamacele womabili eMDC kunkulumo zokulungisisa okuhluphayo bazahlangana ngeviki ezayo bezama ukuxazulula ingxaki ezikhona.
Idale leSadc Troika likhuthaze amabandla la ngeviki edluleyo, ukuthi elungisise konke okuhluphayo phakathi kwawo kungakedluli inyanga. Kodwa inengi lithi kaliboni lokhu kusenzakala.
Ingcwethi ecubungula ezombusazwe, uMnu Brilliant Mhlanga usole imbiko kaKhama kungxoxo ayenze loNtungamili Nkomo weStudio 7 esithi uzulu kazimiselanga ukungena kolunye ukhetho ngoba elokhu esathithibele nxa ecabanga udlakela olwenzakale kukhetho olwedluleyo.