Uqale engumabhalane obesamukela incingo ehofisini kaMongameli, kodwa namuhla ungumkaMongameli njalo abanye bathi laye ukhanya efuna ukuba nguMongameli.
Sikhuluma ngoNkosikazi Grace Mugabe yena oqhubeka esemilonyeni yabanengi kulandela ukungena kwakhe kwezombusazwe.
UNkosikazi Mugabe uzelwe mhlaka 23 ngoNtulikazi 1965 eChivu enguGrace Marufu wasesendela kuMnu kuStanley Goreraza.
Ngokuphelelwa ngumtshado koGorereza, ubophe ifindo loMugabe kulandela ukufa kowayengumkake uNkosikazi Sally Mugabe, yena obhubhe ngo1992.
Uqale ukuphuma ezindabeni ngeminyaka yabo 90 intathelizindaba sezizwe ngomntwana kaMugabe owayesezelwe kodwa engayisuye kaNkosikazi Sally Mugabe.
Ngaleso sikhathi uNkosikazi Sally Mugabe wayeselele phansi ngomkhuhlane wezinso, esekhulile sokusobala ukuthi umuzi wabo awusoze ube lomntwana.
Esefile uSally, uMongameli Mugabe loNkosikazi Grace Mugabe batshada ke ngo1996. Abanye bacabangela ukuthi ababili laba babevele bethandana njalo uMugabe esekhiphe lamalobolo umuyi engakafi.
Kusuka lapho, uNkosikazi Mugabe waphanga waduma ngokuthenga izigqoko ezidulayo.
Kazange azingene ezombusazwe ngaleso sikhathi, kodwa waba ngumuntu owaziveza njengoMama olomusa onakekela ikakhulu abaswelayo.
Ngalokho, wasungula inhlelo ezigoqela indawo yokugcinela intandane kanye lamabhizimusi athile agoqela iGushungo Holdings.
Kodwa ngomnyaka odluleyo uphenduke abanengi belibele wakhwaza okwesilo esengenile kwezombusazwe, esekhethiwe ukuba ngumkhokheli wohlangothi lwabesifazane kubandla leZanu PF.
Wafika ngamandla esavunguzane waxotshisa owayengumsekeli kaMongameli uNkosikazi Joyce Mujuru kuhulumende lakubandla esithi ubezama ukugenqula uMugabe embusweni.
Zinengi iziphathamandla zeZanu PF ezaxotshwayo loMujuru ezigoqela uMnu Rugare Gumbo, uMnu Didymus Mutasa, uMnu Ray Kaukonde, uMnu Jabulani Sibanda, uMnu Temba Mliswa labanye.
Ukuphiwa kwakhe isicoco sePHD eUniversity of Zimbabwe kuvuse inkophe zabanengi bezibuza ukuthi ngempela wazenza lezi zifundo na kumbe hatshi.
Abanengi basele bezibuza ukuthi ngokufunda afike kuzinga leli kambe engaba ezilungiselela ukuba nguMongameli weZimbabwe na uNkosikazi Mugabe nxa umkakhe engasuka embusweni?
Isakhamuzi seHarare uMnu Elijah Mutemeri uthi kungaba yinto enhle kakhulu ukuthi ilizwe likhokhelwe ngumuntu wesifazana.
Kodwa uthi uNkosikazi Grace kabulungelanga ubukhokheli kanti njalo akalaso isithunzi.
UNkosikazi Lorraine Sibanda ohlala eGwanda yena uthi njengowesifazana usekela umqondo wokuthi omama labo baphatheke kwezombusazwe njalo baziphathe esidukwini.
Uthi akusolayo ngoNkosikazi Mugabe yikuthi ukhanya engabahloniphi abanye abesifazane, ikakhulu nxa kukhangelwa indlela ahlambaze ngayo uNkosikazi Mujuru emphakathini.
UMnu Farai Dzapasi oqeqesha ozombusazwe uthi akaboni uNkosikazi Grace encintisa ephumelela kungela sekelo lukaMongameli.
Kungabalula kuye nxa engafakwa esikhundleni uMongameli Mugabe esaphila, kutsho uDzapasi.
Your browser doesn’t support HTML5
Inhlandla lakuqala lwendaba ezikhangela impilo kamkamongameli uNkosikazi Grace Mugabe