Amalunga enhlanganiso yezakhamizi, zomunye umuzi waseHarare eye Southlea Park Home Owners Association, athi asehlalele evalweni lokuthi angaxotshwa yiloba yisiphi isikhathi wona eseyakhile.
Ngaleso sizatho sebecabange ukukhweza udaba lwabo emthethwandaba waphezulu oweHigh Court, befuna uveze ukuba ngubani umnini wephulazi ele Odar Farm lapho okutholakala khona umuzi lowo owe Southlea Park.
Emhlanganweni lentathelizindaba owenzelwe eQuill Club, eweteleni ye New Ambassador eHarare, abenhlanganiso le, bathi lelinyathelo elithethwe yizakhamizi, kungasimpi abayilwayo kodwa kungoba sebephelelwe, bengasazi ukuba benzeni.
Ubufakazi obusengwalweni zalinhlanganiso ye Southlea Park Home Owners Association, luveza ukuba iphulazi le Odar Farm, lapho okwakhelwe lumuzi liphulazi elathathwa nguhulumende mhla zilitshumi lasithupha kunyanga kaNhlangula ngomnyaka ka 2006. Kwenziwa okuthiwa yi Deed Transfere 816/65 ngaphansi kohlelo luka hulumende olwe Operation Garikai/Hlalani Kuhle.
Osekwethuse izakhamizi lezi yincwadi ezisanda kuyithunyelwa ethi kumele ziphume ziphele kuleyondawo isithiwa ngeyenkampani yeSensene Investment ( Pvt ) Ltd, ekasomabhizimusi uMnu. Phillip Chiyangwa. Bathi yilesi sizatho esesibenze bathatha inyathelo lokusa loludaba emithethwandaba ukuze kuxazululwe ukuthi ngubani sibisibili umnikazi walindawo.
Umnumzana Joseph Brian Tshuma ngomunye wezakhamizi zeSouthea Park. Lumphatha kubi loludaba uTshuma ethi akasakwazi ukuba enzeni njalo aye ngaphi.
UTshuma ukhuthaza uhulumende ukuba ululungisise loludaba njengoba enguye owazi imbali yokuba khona kwabo kiyo, enguye njalo ngaleso sikhathi owabavumela ukuba bakhe ngemva kokuyithathela abenkampani yegwayi eye Zimbabwe Tabacco Association – ZTA.
Kunje sekungabantu asebehlalele evalweni bengazi ukuba benzeni, kungakho bekubone kufanele badinge usizo emthethwandaba we High Court, ukuba uxazulule loludaba.