Umongameli weleMelika uMnu Joe Biden uyala ukudedela omunye njengokukhuthazwa ngabanye abakhokheli bebandla lakhe kulandela ukungaqhubi kuhle kwezinye izigaba zengxoxo-mpikiswano ayenze loDonald Trump ngenyanga edluleyo.
Nxa uBiden engangenanga kukhetho emele ibandla lamaDemocrats ngubani ozangena?
Umongameli Joe Biden uthi ungena kukhetho lolu ngenhloso yokunqoba.
"Ngibona sengathi yimi ngedwa engingenelisa ukuncintisa kukhetho lukamongameli,” kutsho uBiden.
Kulandela ukungaqhubi kuhle kwakhe kungxoxo-mpikiswano ngenyanga edluleyo, abanye abakhokheli bebandla sebekhuthaze uBiden ukuthi adedele omunye kusikhundla sozamela amaDemocrats kukhetho lukamongameli.
Umqondisi weUniversity of Virginia Center for Politics uMnu Larry Sabato uthi kulandela ukuqhutshwa kokhetho lwama primaries ibandla lamaDemocrats alingeke limsuse esikhundleni lesi.
UMnu Sabato uthi, “akula eyinye indlela eyokukhupha okhethwe ukumela ibandla kukhetho, ngaphandle kokuthi yena athi akasenelisi ukuncintisa kungakaqhutshwa umhlangano weConvention, nxa lokhu kungenzakala iDemocratic National Committee, yiyo esingenela ifaka imithetho yokuqhutshwa kwe- convention.”
Nxa uBiden engatshiya lesi sikhundla, umsekeli wakhe uKamala Harris nguye ongathatha lesi sikhundla. UHarris uthi uBiden nguye owakhethwa libandla njalo usetshengise ukwethembeka ngendlela etshiyene lekaTrump, osowehlukana lowayengumsekeli wakhe uMike Pence.
"Phakathi kukaJoe Biden loDonald Trump, kuloyedwa kuphela osekelwa ngumsekeli kamongameli amkhethayo --- uJoe Biden."
UHarris engamela ibandla lamaDemocrats kulolukhetho ulakho ukuphathisa ngokuletha abavoti abangela cele kutsho usikhwicamfundo Christian Grose oweUniversity of Southern California.
“Into eyodwa elakho ukwengeza amathuba okuvotelwa kukaKamala Harris kuloBiden yikuthi abangela cele abanengi abakathathi isinqumo sokuthi bengamvotela na, ngakho ulakho ukubancenga ngcono ukwedlula uBiden,” kutsho uGrose.
Omunye olakho ukuthatha isikhundla sokumela amaDemocrats nguGovernor weCarlifonia uMnu Gavin Newsom.
Laye uthi usekela uBiden njalo uveze lokhu ekhankasela ukukkhethwa njalo kukamongameli eMichigan ngeviki edluleyo.
"Into eqakathekileyo kimi yimpumela, njalo impumela kaBiden isegcekeni. Angidingi umuntu olamandla, ngidinga umkhokheli oqotho," kutsho uNewsom.
UGovernor weMichigan, uGretchen Whitmer ngomunye wabakhokhela okubikwa bengathatha isikhundla sikaBiden. Laye uthi ulokhu esekela umongameli.
Unkosikazi Whitmer wakhethwa njalo kusigaba esiqakathekileyo kukhetho njalo ethandwa ngabanengi kubandla lamaDemocrats ngoba esekela inhlanganiso ezimela izisebenzi njalo ezama ukumisa udlakela lwezibhamu.
“Sibona indaba ezilochuku ezifanayo nsuku zonke lapha eMelika. Indawo zonke ongazicabanga zikhangelane lodubo lodlakela lwezibhamu.”
UGovernor weKentucky uAndy Beshear kaziwa kakhulu elizweni njengo Newsom loWhitmer, kodwa waziwa kakhulu esigabeni esisezansi yelizwe esilabasekeli abanengi abebandla lamaRepublican.
UGovernor weIllinois uJ. B. Pritzker nguye ophatha umhlangano omkhulu walonyaka wamaDemocrats oweconvention njalo ulemali yakhe enela ukusebenza kumkhankaso kamongameli ophuze ukuqala.
Njalo kuloMichelle Obama ohlala esala ukungena kukhetho lukamongameli kodwa olokhu ethandwa ngabavoti abanengi. Ucwaningo lweReuters olokhetho ngeviki edluleyo beluveza ukuthi uBiden lo Trump bengathola amavoti alinganayo kodwa uMichelle Obama enganqoba uTrump ngenani eliyisilinganiso esedlula itshumi ekhulwini. USabato uthi akasoze ancintise.
“Ukhaliphile, kangeke afuna ukubuyela eWhite House njengomongameli ngemva kokuba ngumka mongameli okweminyaka eyisitshiyangalombili. Ngakhoke, singakhuluma ngamabizo ubusuku bonke, kodwa okuqakathekileyo yikuthi ngubani ofuna ukungena kulesisikhundla kumbe owenelisa ukubuthanisa imali yomkhankaso njalo elethuba lokubumba iqembu elinganqoba kuconvention.”
Nxa uBiden engaqhubeka ngokuncintisa, udaba lokuthi ngubani ongathatha isikhundla sakhe lulakho ukuqhubeka kuze kuyeqhutshwa umhlangano weconvention yebandla lama Democrats eChicago ngenyanga ezayo.
SEE ALSO: Lalela Okugcweleyo Ngaloludaba.