Obengumkhokheli weqembu lomdlalo wenguqu eleHighlanders, uNdumiso Gumede ubhubhele esibhedlela seMpilo koBulawayo ngoLwesithathu.
UGumede udlule emhlabeni emini ngemva kokuba ekhale ngesisu ngoLwesibili wagijinyiselwa esibhedlela lapho okutholakale khona ukuba engaba ekhathazwa ngamatshe ezinsweni zakhe.
Ubhubhe sekuzatshaya ihola lesibili emini ngesikhathi kulungiselelwa ukuba ayekwenziwa esinye iscan ukuze abemtholampilo bathole iqiniso elokuba kuyini obekumkhathaza.
UGumede utshone ngemva kwensuku ezimbalwa eyenzelwe idili ngabalandeli beqembu leHighlanders bembonga ngomsebenzi omkhulu awenzele iqembu leBosso.
Intathelizindaba yezemidlalo, uNash Mkokwayarira, laye wayeyingxenye yalabo ababekholisa bendawonye loGumede ngeviki eyedluleyo.
“Sizananzelela ukuthi uwenzelwe umdlalo omkhulu kuthakazelelwa iminyaka engamatshumi amane lathoba minwe mbili esemdlalweni wenguqu mhla we Unity Day oqhutshelwe eHighlanders Clubhouse.
"Hawu! Abantu besingakwazi ukuthi bekuyikumvalelisa uNdumiso Gumede ngokumenzela umdlalo wokuthakazelela iminyaka abeseyifikisile eyinkokheli yomdlalo wenguqu. Kuyisimanga ukuthi kungakabi lensuku ezingaki sekuthiwa akasekho,” kutsho uMkokwayarira.
UGumede ubeseleminyaka yokuzalwa engamatshumi ayisikhombisa lanhlanu - 75 eyokuzalwa.
Uqale ukusebenzela iqembu leHighlanders ngo1974 engumeli walo esigodlweni iHarare njalo uphathe izikhundla ezinengi kuleliqembu ezigoqela ukuba ngumgcinisihlalo weqembu kanye lokuba ngumqondisi walo (chief executive officer).
Uke wasebenzela njalo inhlanganiso ebona ngokuqhutshwa komdlalo wenguqu elizweni eyeZimbabwe Football Association lapho abephethe isikhundla somsekeli kamongameli.
Your browser doesn’t support HTML5
UAlexander Maseko Ukhuluma Ngokubhubha Kuka Ndumiso Gumede
Kolunye udaba olufanayo, owayengumdlali weqembu leDynamos uIsaac Nhema udlule emhlabeni izolo ngemva kokuba olunye uhlangothi lomzimba wakhe lutholakale lungasasebenzi kuhle.
Laye ubeseleminyaka engamatshumi ayisikhombisa lanhlanu eyokuzalwa.
Kusenjalo, abaqeqetshi beqembu labesilisa elimela ilizwe emdlalweni wenguqu elama Warriors namhla bayethule uluhlu lwabadlali abangamatshumi amabili lantathu abazamela ilizwe le Zimbabwe kumncintiswano we Africa Cup of Nations kwele Cameroon ekuqaleni kuka Zibandlela.
Laba badlali ngababalisa onozinti abathi uPetros Mhari, uTalbert Shumba kanye lo Martin Mapisa, imvimbi uGodknows Murwira, uGerald Takwara, uOnismor Bhasera, uBruce Kangwa, uPeter Muduhwa, uTeenage Hadebe, uTakudzwa Chimwemwe, uAlec Mudimu kanye lo Jordan Zemura.
Abadlali benkabeni yenkundla uThabani Kamusoko, uKundai Benyu, uIshmael Wadi, uNever Tigere, uKelvin Madzongwe, uKudakwashe Mahachi kanye lokaputeni weqembu uKnowledge Musona.
Abagadli uPrince Dube, uTinotenda Kadewere, uAdmiral Muskwe kanye lo David Moyo.
Iqembu lama Warriors lisuke namhlanje lilubhekise kwele Cameroon lapho elikusibaya sika Group B ndawonye le Malawi, Guinea kanye le Senegal.