Umkhokheli wedale leHouse of Representatives kwele Melika, uNkosikazi Nancy Pelosi, uthi sesifikile isikhathi sokuthi kwethulwe amacala abhekane loMongameli Donald Trump, okubikwa ukuthi wacela umongameli wakwele Ukrainne ukuthi abatshutshisi bakulelolizwe bahlolisise okwakusenziwa nguMnu. Hunter Biden, owayengumqondisi wenkampani ephehla umlilo kagetsi, okucatshangelwa nguTrump ukuthi yayilobukhohlakali obumangalisayo.
UHunter Biden ngumtaka Joe Biden owayengumsekeli kaMnu. Barack Obama. Amacala la azakwetheswa uTrump ethulwa ngaphansi kokuthoniswa kukamongameli wakwele Melika, okwaziwa ngokuthi yi-Impeachment.
UPelosi ubike ngoLwesine ukuthi sokumele kuhlelwe kahle wonke amacala abhekane loTrump kungakaphanyekwa kudale leSenate.
“UMongameli watshaphaza iwofisi yakhe esenzela ukuthi ancedakale kwezombangagwe ngokulwisana lozancintisana laye. UMongameli usitshiye kungelanto esingayenza ngoba ufuna ukuncedakala kwezombangazwe.”
Your browser doesn’t support HTML5
Okwethulwe NguNkosikazi Nancy Pelosi
Kuthiwa uTrump wayefuna ukuthi ilizwe leUkrainne lihlolisise okwenziwa langu Joe Biden omcabangela ukuthi wavimba ukuthi umntanakhe athoniswe icala lobukhohlakali kulelolizwe.
Abakubandla lama Democrats bathi uTrump wayefuna ukusebenzisa udaba lolu ukwenzela ukuthi akhankase ngalo ngesikhathi kulungiselelwa ukhetho lukamongameli oluzakwenziwa ngomnyaka ozayo. Kubikwa ukuthi wamisa ukuthi eleUkrainne linikwe izikhali ukwenzela ukuthi liqale livule icala lika Hunter Biden.
Idale leHouse of Representatives lithi konke lokhu kuveza ukuthi uTrump wenza ubukhohlakali njalo wala ukuthi abanye bakhe bakhulume ngodaba lolu. Abakubandla lama Republicans bathi amaDemocrats afuna ukugenqula uTrump owanqoba bethembile kukhetho olwenziwa ngomnyaka ka2016.
Udaba lolu luzaphanyekwa edale leSenate elikhokhelwa ngama Republicans kunsukwana ezilandelayo.
Ekhuluma ngodaba lolu, ingcwethi kwezombusazwe, uMnu. Den Moyo, utshele uGibbs Dube weStudio 7 ukuthi abakubandla lama Democrats bazimisele ukujezisa uTrump.
Your browser doesn’t support HTML5
Ingxoxo Esiyenze LoMnu. Den Moyo