UMongameli Robert Mugabe selandule imbiko ethi umkakhe ukhangele isikhundla sokuba nguMongameli welizwe ngelihlo lokhozi.
Ekhuluma emsakazweni weZBC, uMugabe uthe uNkosikazi Grace Mugabe kalasifiso sokuthatha isikhundla sakhe njengokucatshangelwa ngabanengi.
Ekungeneni kwakhe kwezombusazwe ngo2014, uNkosikazi Mugabe uqalise ukwethesa amanye amalunga eZanu PF icala lokuzama ukususa uMugabe embusweni.
Lokhu kubangele ukuxokozela lokufuhelana okhukhulu okulokhe kuqhubeka kubandla leZanu PF njalo abanengi abafana loNkosikazi Joice Mujuru sebaxotshwa.
UMongameli Mugabe uthe njalo abalwela isikhundla sakhe kumele batshiyane lalokhu ngoba esasekhona, kanti njalo lesikhathi sakhe sokubusa asikafiki komlindi uyacina.
Ukuhlaziya amazwi la iStudio Seven ixhume ingcwethi kwezombusazwe uMnu Nkululeko Sibanda.
"Angiboni ukuthi bakhona abakukholwayo okukhulunywa nguMugabe lokhu," kutsho uDr. Sibanda.
Ngibona angani abacabangela ukuthi uNkosikazi Mugabe ufuna isikhundla sokuba nguMongameli bengaba beseqinisweni ngoba izenzo zakhe zitshengisa ukuthi kukhona okukhulu okukhona."
Your browser doesn’t support HTML5
Ingxoxo loMnu Nkululeko Sibanda