Umkamongameli unkosikazi Grace Mugabe uthi okumele bayethoniswa edale laphezulu lamazwe womhlaba ele International Criminal Court-ICC, elise Hague, kumele kube yinkokheli eyake yabusa kweleMelika le Bhilithani, umnumzana George Bush lomnumzana Tony Blair hatshi inkokheli zamazwe abensundu zezwekazi leAfrica.
Unkosikazi Mugabe usole kakhulu idale le ICC, emazwini akhe awethule emhlanganweni weChimhanda Secondary School, eRushinga esigabeni seMashonaland Central, ethi ngoba kusobala ukuba lakhelwa inkokheli yonsundu yamazwe awezwekazi leAfrica.
Uqhubeke ethi okumele bayethoniswa kilo owayengumkhokheli we Britain umnumzana Tony Blair lowake wakhokhela eleMelika umnumzana George Bush, hatshi inkokheli ensundu,yasezwekazi leAfrica.
Ababili laba, unkosikazi Mugabe uthi, yibo abadala amacala esabekayo, amakhulu njalo abangela ukulahlekelwa kwemiphefumulo kwabanengi kwele Iraq, ngesikhathi bebeka umkhokheli walelo lizwe umlandu wokufihla izikhali zombhuqazwe.
Uphinde njalo umkhuba wakhe wokuthuka owake waba ngumsekeli kamongameli, owaxotshwa ebandleni elibusayo leZanu PF unkosikazi Joice Mujuru, esithi ulakho ukungayi bekwa emathuneni angcwatshwa amaqhawe aweNational Heroes Acre lanxa walwa impi yenkululeko ngenxa yalokho athi yikuphambanisa akwenza ebandleni.
Umsekeli kamongameli umnumzana Phelekezela Mphoko, obekhona laye kulumhlangano, uqhubeke ngomkhuba wakhe wokuncoma uNkosikazi Mugabe. Wathuka abalemibono ehluke kweyabo ethi ongasekeli umongameli Mugabe ukhululekile ukuphuma ebandleni.
Njengenhlalayenza, unkosikazi Grace Mugabe uveze impahla ayilethele uzulu we Rushinga, ebalisa izembatho esezike zagqokwa, amafutha okuphekisa, i-rice lomumbu.