UMongameli Robert Mugabe uthi ilizwe lakhe livumelana lokwenziwa ngamazwe wonke azama ukunqabela ukukhudumala komkhathi okuletha indlala lokunye okwenza uzulu ahlupheke.
UMugabe wethule amazwi la izolo ntambama emhlanganweni weConference of The Parties owaziwa ngokuthi yiCOP22 owenzelwa edolobheni leMarrakech kwele Morocco.
UMugabe uthi ilizwe leZimbabwe elibhekane lendlala emangalisayo ngenxa yokungani kwezulu, ilungiselela ukusayina isivumelwano se Paris Climate Change Agreement sokunqabela ukuguquka komkhathi okulethela uzulu ukudubeka emhlabeni jikelele.
Uphinde wathi eleZimbabwe libhekane lokusilela kwamanzi ngenxa yokungani kwezulu osokwenze ukuthi amadolobho amanengi aphungule amanzi atholwa nguzulu.
Uthe okwamanje uhulumende wakhe usebumbe iqula lekhomithi ekhangelane lokulungiselela ukuphungula intuthu eZimbabwe okwedlula isilinganiso sokungamatshumi amathathu ekhulwini – 33% kusiyafika umnyaka ka2030.
Your browser doesn’t support HTML5
UMongameli Robert Mugabe Ukhuluma Emhlanganweni weCOP22
Kambe umhlangano lo unganqabela konke lokhu na? Ukuze sihlaziye loludaba akesizwe uMnu. Michael Ndiweni, ingcwethi kwezentuthuko lezombusazwe, othe kumele ilizwe leZimbabwe lizilungiselele ekunqabeleni indlala lokunye okubangwa yikuguquka komkhathi.
Your browser doesn’t support HTML5
UMnu. Michael Ndiweni Uxoxa Ngesimo Somkhathi Emhlabeni Jikelele
Inkokheli yamazwe atshiyeneyo ithe gwaqa edolobhebi le Marrakech eMorocco lapho okulomhlangano omkhulu ohlolisisa isimo somkhathi emhlabeni wonke jikelele.
Umhlangano weConference of The Parties kumbe COP22 ukhangelelwe ukuthi uzaqinisa izinqumo ezathathwa yinkokheli yomhlaba eParis kwele France ezikubeka sobala ukuthi kumele kuqoqwe imali yokusetshenziswa ukuphungula intuthu yamafekithali lezimota ephambanisa isimo somkhathi.