Ugatsha lwabatsha kubandla leZANU PF luhlangene ngoLwesibili lulungiselela umkhosi wokunanza ilanga lokuzalwa kukamongameli Robert Mugabe ozakwenzelwa edolobheni leVictoria Falls ngeviki ezayo, ngesikhathi ugatsha lolu lukhankasela ukuthi ilanga lokuzalwa kukamongameli libe likhefu.
Umgcinisihlalo wogatsha lwabatsha kulelibandla esigabeni seMatabeleland North uMnu. Tamuka Nyoni uthi amankampani kanye lenkonzo zokholo lwesikristu banike ibandla lakhe okuzadliwa kulelilanga, okugoqela inyathi ezintathu, njalo ugatsha lukahulumende olubona ngezendle lona soluthembise ukupha indlovu.
UMnu. Nyoni utshele uSithandekile Mhlanga weStudio 7 ukuthi ibandla lakhe likhangelele ukuthi kubuye abantu abedlula inkulungwane ezingamatshumi amabili kulumkhosi hatshi ukuthakazalela ilanga lakhe lokuzalwa kuphela kodwa lokumtshayela umongameli Mugabe ihlombe ngokukhethwa kwakhe ukuthi abangemgcinisihlalo wenhlanganiso yomanyano wamazwe awezwekazi labensundu oweAfrican Union.
Your browser doesn’t support HTML5
Ingxoxo LoMnu. Tamuka Nyoni