Umsekeli kaMongameli, uMnu. Phelekezela Mphoko usecele amabhanga ukuthi ehlise umthelo ofakwa phezu kwezikwelede, i-interest rate, okuzakwenza kubelula ukuboleka imali emabhanga.
Okwamanje amabhanga afakela isilinganiso sokungamatshumi phose amabili, 18 percent emalini ebolekiweyo.
UMphoko ubephawula isikhwama sebhanga le CBZ esemali eyizigidi ezilitshumi ezabolekwa ngabamabhizimusi amancane ayabefuna izikwelede ezingafika imali ezinkulungwane ezingamakhulu amabili, $200 000.
Umsekeli kamongameli uthe lanxa lesi sikhwama sizaphathisa osomabhizimusi belizwe lonke jikelele abavela esigabeni seMatabeleland kuzamele basukumele phezulu.
"IBulawayo izathuthukiswa yini bantu abahlala kulelidolobho. Umuntu ovela koMurehwa uthuthukisa lapho ahlala khona njengolowo laye ohlala eBinga. Ngokunjalo lina elihlala koBulawayo kumele lithukise lelo dolobho," kutsho uMphoko.
Umphathintambo wezamabhizimusi amancane, uNkosikazi Sithembiso Nyoni, obekhona kulumbuthano, uthe uzulu kumele engabi ngohlala ekhala ngoba leso sikhathi sokukhala sesedlula sekumele abantu basukume benze amabhizimusi.
"Sihlezi sizilungiselele ukusebenza labamabhanga ukuze sithuthukise amabhizimusi amancane. Njangoba ngitshilo silapha ukuliphathisa," kutsho uNyoni.
Ukuhlaziya loludaba sixoxe lomkhokheli wenhlanganiso yezamabhizimusi, I Confederation of Zimbabwe Industries, uMnu. Busisa Moyo uthi mpela kumele amabhanga ehlise umthelo we interest ukuze umnotho welizwe uthuthuke.
UMoyo uthe: "Kumele sibili kwehliswe imali ye interest rate ngoba inengi labosomabhizimusi lesaba ukuyadinga izikwelede ngenxa yokuthi sebebhadala limali iyabe isinengi kakhulu."
Your browser doesn’t support HTML5
Ingxoxo loMnu. Busisa Moyo