Abantu abanengi bathi uMnu. Morgan Tsvangirai lomsekeli wakhe uNkosazana Thokozani Khupe kumele bakhulumisane ngokuhlupha uMaKhupe ngomanyano weMDC Alliance othi kawenziwanga ngemfanelo.
Abantu abaphendule umbuzo, ebulenjini bokuzilibazisa obeFacebook ekhasini leVOA Ndebele, wokuthi ababili laba kumele benzeni ukwenzela ukuthi umanyano weMDC Alliance unqobe ibandla laZANU PF kukhetho oluzakwenziwa ngomnyaka ozayo, inengi labo lithe okoniwe ngomlomo kulungiswa ngomlomo.
UMaKhupe kayanga emhlanganweni oqoqwe ngumanyano weMDC Alliance owenzelwe koBulawayo ngoMgqibelo okwenze ukuthi kubelabantu abalutshwana emhlanganweni lo owenzelwe eWhite City Stadium.
Omunye ophendule umbuzo okuVOA Ndebele Facebook nguMnu. Jeff Moyo, othe, "Kufanele behlale pansi beyilungise indaba le ngoba .... isitha yiZanu hatshi uWelsh (Ncube)."
UNkosazana Thokozani Khupe
Banengi abalombono onjengoka Moyo abathe uTsvangirai ulakho ukuthi engadliwa libandla leZANU PF kukhetho oluzayo ngenxa yokuthi uzalahlekelwa ngabalandeli abanengi ukhetho lungakenziwa.
UMnu. Khumbulani Tshuma uthe akumelanga uTsvangirai enze njengoMugabe.
"Indlela uTshangilayi (Tsvangirai) enza ngayo yiyo enza lomanyano ungaqini. Seveze sobala ukuthi yena lo Mgabe (Mongameli Robert Mugabe) akulamehluko. Wavela waphambanisa ngokudobha abasekeli abanye ngendlela efana lakwenzayo kuAlliance, kukhala esakhe isicathulo kuphela.”
Lokhu kusekelwe nuMnu. Ngqabutho Hlongwane othe, "UTsvangirai engathi uzahlupha laye uma engalibusa ilizwe ngoba engathi akafuni ukuboniswa kanti izinqumo awukwazi ukuzithatha uwedwa eqenjini."
Kodwa-ke uMnu. Ntunga Malaba uthe uMaKhupe nguye olenkinga.
"UMaKhupe uzenza bani kanti? Laye udinga isikhundla sokuba ngomongameli webandla leMDC-T."
UMaKhupe ukhala ngokuthi umanyano weMDC Alliance wenziwa ngendlela engaqondanga njalo ibandla leMDC elikhokhelwa nguMnu. Welshman Ncube laphiwa izikhundla ezinengi zokuncintisa kukhetho lwamalunga ephalamende.