Umongameli Emmerson Mnangagwa uthi ingxaki ezihlasele ukhetho lwama primaries yizikhubeko nje kuphela ezitshengisa intando kazulu ekubandla le Zanu PF. Umnangagwa uthi ibandla lakhe lizanqoba okubanzi.
Embikweni awethule ngoMvulo, umnangagwa uthe ukhetho lwama primaries lolu lutshengise mgceke ukuthi lelibandla liseqinisweni lokuthi kwenziwe intando kazulu.
Kunjalo nje, iziphathamandla zebandla leZanu PF ezimbalwa ezansi yemandebeleni kubikwa sezinqotshiwe kukhetho lokudinga labo abazamela lelibandla kukhetho oluzayo. Umphathintambo obona ngenzenzakala ezansi yemandebeleni umnu abedinico ncube kanye lomntanakhe, uEmmanuel Ncube, banqotshiwe kukhetho.
UNcube unqotshwe ngunozindaba odumileyo Omphile Marupi ngamavoti afika phose ikhulu eGwanda South okutsho ukuthi uMarupi nguye osezamel iZanu PF kukhetho lwabameli bedale lephalamende.
UMntakaNcube uEmnanuel obencintisana losodolobho weGwanda uMnu Knowledge Ndlovu kukhetho lwamakhansila kuWard 3 laye unqotshiwe.
UMnu. Wilson Dube ukhansila kaWard 8 edolobheni leGwanda kasayi kubuyela kumanisipala ngemva kokuba laye enqontshiwe. UDube nguye yedwa kumakhansila ayisikhombisa aweZanu PF edolobheni leGwanda olahlekelwe yisihlalo sakhe.
Kodwa ayisomuli yakoNcube kuphela ekhala ezimathonsi, eInsiza South uMnu. Malaki Nkomo laye kubikwa enqotshwe nguMnu Speya Sithole kuthi eInsiza North uMnu Andrew Langa laye kubikwa elakho ukutshonelwa lilanga kwezephalamende ngoba ethwaliswe amagabha avuzayo ngu Mnu. Farai Taruvinga.
Ukhetho lweInsiza North luqale izolo ngemva kokuba Abalandeli bakaTarivinga betshengisele ngensonto bekhonona ngokuthi ibizo lakhe belingekho kuluhlu lwalabo abavotelwayo amamaballot paper.
UMnu. Madodana Sibanda umeli weGwanda North edale lephalamende unqobile njalo kukhetho loba nje abalandeli bakaMnu Lungisani Ncube bekhonone kabanzi ngokweqiwa kwebizo lakhe kumaballot papers.
Umeli wedolobho leGwanda edale lephalamende, uMnu Edson Gumbo ubekhokhela ngesikhathi sisiya emoyeni lapho ancintisana khona labo Mnu. Japhet Dube kanye loTrynos Nkomo.
Ukubalwa kwamavoti awokhetho labafuna ukuncintisa isikhundla sozamela iGwanda edale leSenate lakho kuqhubekela phambili lapho amakhosikazi uMargarine Khumalo, uRennie Kibi, uAlma Mkhwebu loPriscilla Mthombeni abanqikilana khona.
EBeitbridge, eMatobo eBulilima Kanye leMangwe ukubalwa kwamavoti kubikwa kuqhubekela phambili njalo impumela yokhetho ikhangelelwe lamhlanje.
Kube lengxaki ezimbalwa kukhetho lwamaPrimary aweZanu PF elizweni lonke jikelele njalo kwezinye indawo zelizwe kubikwa kuqhamuke udlakela kubangwa izikhundla.
Your browser doesn’t support HTML5
Udaba Silethulelwa nguAlbert Ncube